World AIDS Orphans Day hmang

Nimin May 7 kha HIV/AIDS vanga naupang chanhaite pual ni bik, World AIDS Orphans Day a ni a; Gan Sabra chuan IPR Auditorium-ah hmangin, adviser to chief minister (Finance) TBC Lalvenchhunga, MLA-in a hmanpui.

World AIDS Orphans Day hmannaah hian Mizoram State Child Protection hotu te, HIV/AIDS veite enkawlna lama hma latu pawl hrang hrang aiawh te, home hrang hranga thawkte leh HIV/AIDS vanga harsatna tawk mi eng emaw zat an tel.

TBC Lalvenchhunga chuan, thil ṭha ti turin sorkar fawng chelhtu emaw, thuneihna sang tak neih kher a ngai lo tih sawiin, "Inpekna thûk tak nena hnathawh hian awmzia a nei a, chu chu mi dang tan malsawmna a ni ṭhin," a ti a; thil ṭha tih kawnga ṭan la zel turin kal khawmte a chah.

Gan Sabra enkawltu Lucy Remruati Chhangte chuan, sorkar laipui aṭangin ṭanpuina an dawng tih sawiin, "A tam lo a, tun ang dinhmun kan thlen theih chhan chu Mizorama kohhran, khawtlang, NGO leh mimal ṭhahnemngai ṭanpuina min petute vang a ni," a ti.

Gan Sabra hi kum 2006-ah din niin, HIV/AIDS vanga naupang chanhai leh harsatna tâwkte enkawlna a ni a, naupang 40 an enkawl mek. An enkawl tawh zingah hna thawka mahni intodelh te, nursing zir mek leh zir chhuak tawhte an awm a ni.

Gan Sabra hian Community Support and Sponsorship Programme (CSSP) an kalpui a, Aizawl, Lunglei, Champhai, Mamit, Kolasib, Serchhip leh Saitual district-ah HIV/AIDS vanga harsatna tâwk naupang 264 leh chhungkua 118 ṭanpuina an pek bakah, thla tin an zirna senso, ei leh in leh damdawia inenkawlna an tumsak ṭhin.

HIV damdawi - anti retroviral therapy (ART) damdawi an sem chhuak ṭhin a, HIV/AIDS vanga nausen harsatna tâwkte tan hnute tui (formula milk) an pe ṭhin bawk.