Tlabungah 'I Kawtkaiah Sorkar' buatsaih

Lunglei DC office hmalaknain nimin khan Tlabung SDO pisa tualah 'I Kawtkaiah Sorkar' (Prashasan Gaon Ki Ore) tih hun hman a ni a, mipui awlsamna atan dawr theih turin sorkar department hrang hrangte'n hun an hmang.

Tlabunga 'I Kawtkaiah Sorkar' hun hi Tlabung SDO (Civil) Moses Lalfakawma Tlau-in a kaihruai a; Lunglei SDO (Sadar) TT Beikhaizi-i'n hmanpuiin, I Kawtkaiah Sawrkar chu Lunglei DC ruahmannain khaw hrang hrangah hlawhtling taka buatsaih a nih tawh thu leh buatsaih chhunzawm zel tum a nih thu a sawi.

I Kawtkaiah Sorkar tihah hian Lunglei DC Election Branch, Agriculture, Horticulture, Animal Husbandry & Veterinary, Women & Child Development (ICDS), Rural Development Block Development Office, FCSCA, Commerce & Industries, Health & Family Welfare, Mizoram Rural Bank, PHE, PWD leh MVI-te mipui dawr theih turin an inhawng a; Tlabung leh a chhehvel mipui ṭhahnem takin an duh leh mamawhte an thlen bakah, sorkar scheme-te inhrilhfiah a ni.

Lunglei district-ah hian I Kawtkaiah Sorkar hi January 14, 2025 khan ṭan a ni a; Tlabunga buatsaih hma hian Haulawng, Rálvàwng leh Bunghmunah buatsaih tawh niin, mi 1,160-in an chhawr ṭangkai tawh. May 2025 chhungin Lungsen leh Bualte-ah buatsaih leh tum a ni bawk.