India-Pakistan boruak ṭha lo vanga rîkrum thila chêt lâk dan tur sawiho

Siaha District Disaster Management Authority (DDMA) chu nimin khan an chairman VL Hruaizela Khiangte, bawrhsap kaihhruaiin an ṭhukhawm a; India leh Pakistan inkar boruak chhe mek vanga rîkrum thil thlen thulha chêt lâk dan tur (security action plan) an sawiho.

District chhunga sorkar in pawimawhte leh ven him ngai zualte (vulnerable area) chhinchhiaha ven him a ṭul thu te, mipui kaihruaitu tur civil defence warden ruat chungchang te, district chhunga control room ruahman te, vantlang aurinna hman ṭangkaite leh chhungkuain an inchhungkhur ṭheuha an mawhphurhnate sawiho a ni.

Rîkrum thil a thlen thulha tih tur leh tih loh turte mipui hnenah a zau thei ang bera puanzar ni se, an ti a; National Disaster Management Authority-in civil defence chungchanga mipui hriat tur a tihchhuah thupui hrang hrangte sawiho niin, rîkrum thil a thlena chêt dan tur leh lo inrin lâwk nan inkaihhruaina video siam sate thehdarh ni se, an ti.

Siaha DDMA chuan ṭul loah chî-âi mai lo tur leh sorkar thupek zâwm ṭheuh turin mipui an ngen a ni.