Lawngtlai district-ah sawhthing chawh tur qtl 700 vel a la awm

Bána Kaih (Handholding) hmangin Lawngtlai district-ah sawhthing lei thawh khatnaah quintal 1,797.69 lei a ni a, thawh hnihna kalpui mekah qtl 1,000 vel lak khawm tawh niin, qtl 700 vel chawh tur a la awm.

Lawngtlai District Agricultural Marketing Committee (DAMC) chu nimin khan additional DC David Lalrinawma kaihhruaiin an ṭhukhawm a; sorkarin DAMC kuta mawhphurhna a dahte chu ṭha taka hlen ngei ni se, a bik takin sawhthing lei sak ve lohna khuate chu ngaih pawimawh a, chawh hmasaktir tura hmalak ni se, an ti.

Ṭhutkhawma tarlan danin, Lawngtlai district-ah hian sawhthing lei thawh khatnaah qtl 1,797.69 hralh a ni a, sawhthing man chu direct benefit transfer-in a thartute hnenah Rs 89,88,450 pek a ni. Sawhthing lei thawh hnihna atan sawhthing chawh ṭan mek a ni a, secondary collection centre-ah sawhthing qtl 1,000 vel dah a ni tawh a, la chawh loh qtl 700 vel a awm.

Lawngtlai DAMC meeting-ah hian sawhthing lei thawh hnihnaa society-a inziak lut thar turte tan line department-te'n chak zawkin hmalakpui se, an ti a; portal-a upload leh chhinchhiah chungchangah a hma lama secondary collection centre coordinator thar ruahmanpui an rel bawk.