India sipaite tan ṭawngṭai turin ngen

Pakistan-a mi firfiakte'n Pahalgam an beihna India-in sipai chakna hmanga a chhàn lêt mekah India leh India sipaite tan tawngtai turin BJP, Mizoram Pradesh chuan Mizorama kohhrante an ngen.

BJP chuan thuchhuah siamin, India ram vênhimna hna thawktu sipai hrang hrangte tan ṭawngṭai turin kohhrante an ngen a, "India sipaiah hian Mizo hnahthlak tam tak an awm a, keini Pathian nung biate'n kan ram ven him hna thawktu sipaite'n Pathian awmpuina leh venhimna an chan theih nan ṭawngṭai turin Mizorama kohhran hrang hrangte kan sâwm tak meuh a ni," an ti.

Mizoram BJP chuan, mi firfiakte'n Pahalgam-a khualzinte an beih avangin India-in firfiakte a bei let mek tih sawiin, "Tunah hian India sipaite'n India ram venhimna an neihna kawngah chak takin hma an la mek," an ti a; India sorkarin a khua leh tuite thlavâng hauhna atana huaisen taka hma a la chu ropui an ti a, India ram ropuizia lannaa an ngai thu an tarlang.