Thla 9 chhungin chhim lam district Pathumah thubuai 418 ziah luh a ni

Nimin khan Lunglei SP pisa conference hall-ah Mizoram police-a Southern Range quarterly review meeting ṭan a ni a, DIG (SR) Joseph Lalchhuana'n a hmanpui. Kumin January-September chhungin Southern Range huam chhung, Lunglei, Lawngtlai leh Siaha district-ah thubuai 418 ziah luh a ni tih an tarlang.

DIG Joseph Lalchhuana chuan, Southern Range hnuaia district pathuma venhimna leh dan leh thupek kengkawhtu police-te an thawk ṭha hle tih a sawi a; chutih rualin, Lungleia Court leh magistrate quarters khawih a ni leh Siaha Police Station khawih a ni chu vanduaithlak a tih thu sawiin, "Tun aia chak leh khauh zawka hmalak a ṭul a, dan leh thupek kenkawhnaah nasa zawka intuaitharna leh inzirtirna neih a ṭul a ni," a ti.

Review meeting-ah hian Mizoram police Southern Range hnuaia kum 2015 leh 2016 chhunga pawikhawihna thleng leh thubuai ziah luhte khaikhin a ni. Report-a a lan danin, kumin January-September chhungin SR huam chhungah thubuai 418 ziah luh a ni a, hei hi kum 2015-a January-September chhunga thubuai ziah luh 256 aiin 162-in a tam zawk a, a tam zawkna hi 63% a ni.

Report-ah hian, rûkrûk, tharum thawhna leh in chhungkhur buaina leh invauna ang chi nasa takin a pung tih tarlan a ni a; chutih laiin, pawngsual, tualthah leh hmeichhe zahawmna tihbawrhbân thubuai erawh a tlahniam thung. Lirtheia chetsualna case 26 awmin, mi 11 an thih phah bakah, hliam mi 10 an awm a; lirthei chetsual chhan tam ber chu driver fimkhur loh vang a ni.

Kumin thla kaw chhunga thubuai 418 ziah luh zinga 315-ah chargesheet thehluh tawh a ni a; case 159-ah thubuai siamsakte thiam loh chantir niin, mi 43-in thiam an chang thung. Conviction rate hi 78.71% a nih thu an tarlang.

Review meeting-ah hian tun hnaia Saiha leh Lungleia thil thleng tih loh chu a tlangpui thuin boruak a muanawm tih an sawi a; police officer-te chu venhimna kawngah tun aia nasaa dan leh thupek kengkawh turin an inhriattir. Hemi rual hian, mipuite pawh dan leh thupekte zâwm a, dan leh thupek kenkawh kawnga police-te ṭawiawm turin an ngen a ni.