KHAWTHLIR

Thisen pe

N Lungleng Branch YMA chuan an rising day pualin nimin khan blood donation camp an huaihawt a, Aizawl Civil Hospital tan mipa 16 leh hmeichhia pangate'n thisen unit 21 an pe.

Lirthei khû endik

Mizoram Pollution Control Board chuan lirthei khû (emission) endikna an kalpui mek zel a, October 18-21, 2016 chhung khian Mamit district tan Mamit DTO Office-ah endik hna an thawk dawn. October 25–28 chhungin Kolasib-ah lirthei khu endik leh an tum.

Load khap

Traffic SP chuan thupek chhuahin, Aizawl khawpui chhungah chawhma lam dar 8:30 - 11:00 inkar leh tlai dar 3-6 inkarah 207 pik-up leh a aia lian hmangin bung­rua hlàn leh hlànthlak khap a nih thu a puang. Thupek hi October 17, 2016-ah hman ṭan a ni ang.

Zu rûi 26 man

Excise & Narcotics department chuan kumin September thla chhung khan zu zuar 48, zu rûi 26, sap zu ûm puitling ûm175 leh rakzu litre 1197.4 an man a, zu kaihhnawiah lirthei pahnih an man bawk.

Assam Rifles-in Zirtir dawn

IGAR (East) Expedition Team, Assam Rifles chuan nimin khan Mizoram, Assam leh Tripura-a hmun kilkhawr laia mipuite hnena remna, muana, inpumkhatna leh faina chung­chang zirtir turin Parva khua an chhuah san a, 1 AR Bn. commandant col. CC Pun-in a vai liam. Expedition Team-te hian lawng, helicopter leh lirthei hmangin
khaw hrang hrang an pan dawn a ni.

Loneitute zirtir

KVK, Kolasib chuan nimin khan an hmunah 'Awareness campaign on Protection of Plant Varieties and Farmers’ Right Act' an buatsaih. Campaign-ah hian lo neitute thil pawimawh hrang hrang zirtir an nih bakah, zawhna an neihte chu agriculture scientist-te'n an chhang a ni.