Mizoram Science Congress 2016 tan a ni

Nimin khan Mizoram University (MZU) Auditorium-ah ni hnih awh tur Mizoram Science Congress 2016 ṭan a ni a, chief minister Lal Thanhawla'n a hawng. Thupui chu 'Science & Technology for Shaping the Future of Mizoram' tih a ni.

Chief Minister chuan, kawng tinréngah science leh technology-in khawvel nunphung a her danglam nasat thu a sawi a, "Mizoram ang ram ṭhang mekah chuan fundamental research leh applied science hi kaikawp a, tunlai thiamna chhawr ṭangkai a, a taka hman theih ang chi thil ngaihtuah chhuah leh siam chhuah hi mithiamte'n an ngaih pawimawh a ṭul," a ti.

Khawvel danglam zelah digital thiamnain nasa takin mi tinte a tuam mek tih sawiin Lal Thanhawla chuan, "Hengte hian mipui rawngbawlna kawngah leh nitin khawsak ziaah te awlsamna tam tak min siam a, heng thiamnate hi mipui mimirin tam zawka a taka an ṭangkaipui turin pratical zawnga thil kan kalpui a pawimawhin ka hria," a ti a; practical hawi zawnga zirbingna kalpui theih ni se, ramin nasa zawkin hma a sawn a beisei thu a sawi.

CM Lal Thanhawla chuan, Mizorama mipui tam zawk eizawnna chu ram behchhan a nih thu sawiin, "Agriculture lamah, a bik takin tunlai thiamna hman a ṭulin a pawimawh a, sik leh sa inthlak danglam tuar thei thlaite kan buatsaih a hun tawh," a ti.

Mizoram Science Congress 2016 hi Mizoram Science, Technology & Innovation Council (MISTIC), Mizoram Academy of Sciences(MAS), Mizoram Science Society (MSS), Mizoram Mathematics Society (MMS), Geological Society of Mizoram (GSM) leh Bio-Diversity & Nature Conservation Network (BIOCONE) ṭangkawpte buatsaih a ni a; vawiinah chhunzawm a ni ang.

Ni hnih chhung hian mithiam 70 chuangin technical paper an present dawn a, child scientist 27-in zirbingna an neihte an tarlang ang a, department leh zirna in aṭangtein exhibit 50 chuang pholan a ni bawk.