Tennis Court hluia police station sak Lunglei Venglaiin dodal an tum

Lunglei Venglai Village Council hruaituite chuan, Mizoram sorkarin Lunglei Tennis Court hmun hluia police station building sak a tum chu an duh lo a, a tàwp thlenga dodal an tum thu an sawi.

Lunglei Venglai V/C-te hian nimin khan Lung-leia thuthar thehdarhtute an kâwm a; Venglai VCP Zoramdina Ralte chuan, Home department-in Venglai huam chhunga Tennis Court hmun hluia PS building sa tura hmalakna a kalpui chu Venglai khawtlang mai ni lo, Lung-lei hmakhaw ngaihna vang-in an duh lo niin a sawi a, "Hmalakna kal mek pawh contractor kaltlangin chhunzawm lo turin hma kan la a, kan hmalakna hi bialtu MLA hnenah pawh kan thlen tawh," a ti.

Venglai VCP chuan, an veng leh police station sak tumna chu Lungleia veng laili a nih avangin Lunglei khawpui ṭhang zelah a chêp hle dawn thu te, office hmunpui, sumdawnna hmunpui leh auto-rickshaw, maxicab, town bus leh taxi stand a nih avangin khua/veng hrang hranga mite fuan khawmna a nih thute sawiin, hmun tichêp zual tura building sak an remtih loh thu leh vantlang hmun âwl atana zuah an duh thu a sawi a ni.