Sipai lak runpui atan inbuatsaih

Aizawl DC Kannan Gopinathan hoin nimin khan a pisa-ah November 2-6 chhunga Rajiv Gandhi Stadium-a sipai lak runpui neih tur chungchangah meeting neih a ni a, sipai runpui atana inbuatsaihnate an sawiho.

Meeting-a tarlan a nih dan chuan sipai ṭan tumte chuan online-in an in register ngei ngei tur a ni a, online a dil lote chu pawm an ni dawn lo. Online a dilna hun hi tun October 16, 2016 thleng a ni a, www.joinindianarmy.nic.in ah dil theih a ni. Hrechiang duh tan telephone no. 0389-2351518 leh 0389-2351166 ah zawhfiah theih a ni.

Committee chuan sipai lak runpui huna mamawh turte department hrang hrangah chanvo a tuk a, sipai atana intlarte chu ei tur pek tum an ni.