AH&Vety Minister-in vawk farm a tlawh

AH&Vety minister C Ngunlianchunga chuan October 12, 2016 khan Mampui, Lawngtlai district-a AH&Vety farm a tlawh a, vawk note tam zawk thar chhuah theihna tura hmalakna a enfiah.

C Ngunlianchunga chuan, vawk notêa Mizoram a intodelh theih nan hmalakna kalpui mek a nih thu sawiin, "Mampuia Pig Breeding Farm hi vawk note tam zawk thar chhuah a nih theih nan thuam mek a ni. Tihpuitlin a nih hun chuan Mizoram chhim lam district-te chuan hmun dang aṭangin vawk note an lak luh a ngai dawn lo," a ti.

Mampuia Pig Breeding Farm tilian tura hmalakna hi National Livestock Mission (NLM) hnuaia thawh a ni a, tun dinhmunah civil work bikah cheng vbc. 13.42 hmang tawhin, vawk-in awm sa pathum zauh a ni a, pindan pakua leh vawk no neihna pariat sak a ni tawh. Vawk tlatna tur ram sq.metre 4,200-a zau siam a ni a, vawkpui tur 50 enkawl mek a ni.