Mizoram páwna tangkhangte harsatna Mizo welfare-te'n an chhawmdawl mek

Vanglaini palai chuan nimin khan India ram khawpui zinga Mizoram House awm lohna leh House lian tham awm lohna ṭhenkhata Mizo hruaitute a be kual a; Allahabad tih lohah chuan Mizote'n inkharkhip vangin harsatna an tâwk a, Mizo welfare-te'n chhawmdawl hna an thawk mek.

India ram khawpui liana Mizo welfare hruaitute chuan, state sorkar aṭangin ṭanpuina an la dawn loh thu an sawi hlawm a, "State sorkarin list min rawn dil a, kan pe tawh. Inkhârkhip pawh zo se, tam tak hnathawhna hi chu an inhawng leh thei lawk dawn lo a, ṭhenkhat chuan an hnathawk tihtlem a ngai ang. Chu'ngho Mizorama an kîr dan turah pawh lu a hai khawp mai a, tunah pawh pawisa an nei tawh si lo," an ti. Mizoram House changtlung deuh awmna state-ahte chuan Mizo tangkhang harsatna neite'n Mizoram House an pan a; chaw ei man leh thlen man Mizoram sorkarin a chawitir rih lo a ni.

Allahabad Allahabad Mizo Welfare (AMW) hruaitute chuan, Allahabad khawpui leh a chhehvelah Mizo tangkhang 70 vel an awm thu Vanglaini palai an hrilh a, "Pathian zarah harsatna kan tâwk lem lo. Campus pakhatah mi 60 vel an awm a, chumi páwna awm mi 10 vel pawhin ei leh in lamah pawh harsatna an tâwk lo. Kan inngaihven ve reng. Inhlawh chawpa awm kan awm ve chiah lo," an ti.

Bangalore Banglore Mizo Association (BMA) hruaitute chuan zawhna chhangin, Mizo tangkhang 200 vel insawi an awm tawh thu an sawi a, "Kan harsatna tawh ber chu - in luah man pek theih loh, hostel fee pek theih loh leh anmahni chhawrtute'n awmna an la pek si, ei tur an pek theih tawh si lohte a ni," an ti. Bangalore-ah Mizoram House awm mah se, mi 16 vel bak an len loh thu sawiin BMA hruaitute chuan, "Tunah hian thawktute'n awm tura an duh aia tam kan indah tawh. Vanneihthlak takin Mizoram Chief Secretary hmalaknain Maharashtra sorkarin April 14 khan Mizo tan bik liau liau Shelter Home, mipa tan khum 100 leh hmeichhe tan khum 200 vel awmna min pe a, ei leh in a thlawnin an dawng vek dawn," an ti a, nimin aṭang khan an indah luh ṭan thu an sawi. BMA hruaitute chuan, harsatna tâwkte'n inkhârkhip zawha Mizor ama an haw dan tur an zawh nasat thu sawiin, "Central emaw Mizoram sorkar aṭanga thu kan hmuh loh chuan engmah kan tiam theih loh thuin kan chháng," an ti.

Chennai Chennai Mizo Welfare Association (CMWA) hruaitute chuan zawhna chhangin, inkhârkhip vanga Mizorama haw thei lo an hnena insawi mi 419 an awm tawh thu an sawi a; pawl sumin mi 80 chuang ṭanpuina an pek tawh thu sawiin, "Harsatna tâwkte hi Tamil Nadu sorkarah kan thlen a, ṭanpui turin kan nawr ṭhin. Sorkar hian ei turte an pe a, rawngbawlna nei lote chu siam sate an pe. Harsatna nei rawn insawi an awm chuan sorkarah kan thlen ve nghal zel a, anni'n a theih angin ṭanpuina an pe ve zel a ni," an ti. Tangkhang tam ber chu hna thawka awm an nih thu sawiin CMWA hruaitute chuan, "Hlawh la thei lo te, in luah man an pek theih loh vanga hnawhchhuah 

tumte an awm. In luah man nei lo hnawhchhuah an tumte chu thu neitute hnenah kan thlen a, loh theih loh chu in luah man kan peksak," an ti a, hmarchhak mite puala Shelter Home buatsaihah Mizo pariat dah an nih tawh thu an sawi.

Hyderabad Zawhna chhangin Hyderabad Mizo Welfare (HMW) hruaitute chuan, inkharkhip vanga tangkhang mi 500 vel an awm thu an sawi a, "In inluah ṭâwmte an awm a, in anga chhût chuan in 150 vel an ni," an ti. HMW hruaitute chuan, ei leh bara harsatna tâwk an awm thu sawiin, "Mizo ration card leh voter ID nei lote ṭanpui turin Andhra Pradesh sorkar kan ngen a, Mizo awm khawmna deuha awmte chu buhfai kg. 20, dâl leh alute an pe a, hei hian min chhâwk khawp mai," an ti a, Mizo awm khawmna ni loa awmte chu HMW-in an ṭanpui tih an sawi. Sum a ngah loh avangin inṭan pui reng a harsat hun a awm theih thu sawiin HMW hruaitute, "Mizoram sorkarin tangkhangte list min rawn dil a, kan pe a, ṭanpuina an pe chuang si lo. Hetiang a nih dawn chuan min rawn dil tawh lo se a ṭha zawk, a buaithlak mai mai," an ti.