KHAWTHLIR

 AVBD leh NSS ruahman angin Aizawla zirna-in pangaa NSS-te chuan nimin khan Aizawl Civil Hospital Blood Bank-ah thisen unit 55 an pe a, mipa 42 leh hmeichhia 13 an ni. Mizoram Law College aṭangin mi 16, KM HSS aṭangin mi 15, Chaltlang HSS aṭ angin mi 14 leh Public HSS aṭangin mi 10 an ni. Individual donor mi 20 an awm bawk. 

Champhai Ṭhalai Pawl (CṬP) hruaitute chuan April 14 khan an district chhunga ramri depa khua - Ruantlang, Mélbûk, Zokhawthar, Hruaikawn, New Hruaikawn leh Bulfekzawla local task force duty-te an tlawh a, buhfai, chini, bawnghnute, thingpuife leh Rs. 2,000 ṭheuh an pe. Ramri depa duty ṭanpui nan CṬP hnenah buhfai ip 10, chini ip khat, bawnghnute báwm 10 leh Rs. 58,000 thawh khawm a ni a; CṬP chuan khaw dang pawh tlawh leh an tum a ni. 

T Romana College-a thawkte'n sum an thawh khawm Rs. 1,00,000 chu nimin khan CM Relief Fund-ah an pe a; Zamuang, Kanhmun leh Zokhawthara task forcete hnenah Rs. 10,000 ṭheuh an pe bawk. 

Mamit Officers' Club chuan 'MOC Fights Covid-19' tih thupuia neiin nimin khan Mamit district-a ramri hnaih khaw 11 - Kanhmun, Luimawi, Thinghlun, Búngṭhuam, Zawlpui, Hriphaw, Kolalian, Bazirungpa, West Bunghmun, Saikhawthlir leh Chuhvel khuaah ṭanpuina - buhfai, alu, dailuah, chini, tel, thingpuife, torchlight, chi, theitui, chhang, sahbawn leh thosi hlote an hlân. 

Serchhip district mi pathum, Mizoramin Covid-19 vei a neih mek ruala March 16, 2020a thlawhnaa haw vete inkhung hran hun (ni 28) chu April 13, Thawhlehni khan a zo a, taksaah harsatna an neih loh avangin Ser chhip District Task Force Medical Team chuan Covid-19 an kai lo a ni tihchianna declaration certificate an hlân. 

Serchhip Sub-Hqrs. hruaitute chuan April 14, Thawhlehni khan an district chhunga Myanmar ramri depa awm Sailulak leh Lungkawlh khuaa task force duty-te an tlawh a; Covid-19 laka invènna atana hmalak dan tur thil pawimawh hrang hrang an sawipui bakah, Serchhip DC aiawhin CM's Relief Fund aṭanga khawchhak tlangdunga task force hrang hrangte chan tur pawisa an hlân nghal.