MLA C Ngunlianchunga chhui phalna sorkarin a tichhuak

Mizoram sorkar chuan Lawngtlai West bialtu MLA C Ngunlianchunga chu eiruk thubuaiah chhui phalna leh a chungthu ngaihtuah phalna, prosecution sanction order a tichhuak.

District Council & Minority Affairs secretary Zodingpuii'n Governor hminga April 30, 2025-a order a tihchhuaha tarlan danin, C Ngunlianchunga hi LADC chief executive member a nih laiin Lawngtlai by-pass road siamna tur sum DoNER aṭanga rawn kal tihchingpennaa inhnamhnawihah puh a ni a; a lakah PC Act leh IPC hmangin thubuai ziah luh a ni.

Assembly budget session hnuhnung berah khan Chief Minister chuan MLA C Ngunlianchunga'n eiruk thubuai a neih thu a sawi chhuak a; C Ngunlianchunga erawh chuan eiruk thubuai a neih a hriat loh thu leh, anticipatory bail lak a tum loh thu a sawi thung.