Lehkhabu lehlin ṭha ber 'Pa Hausa, Pa Rethei'

Mizo Writers Association (MWA) chuan ṭawng danga ziah lehkhabu Mizo ṭawnga lehlin, kum 2024 chhunga chhuak zinga ṭha ber atan Lalrinzuala Pachuau lehlin 'Pa Hausa, Pa Rethei' tih an thlang.

Lehkhabu hi Robert T Kiyosaki leh Sharon Letcher te ziah 'Rich Dad, Poor Dad' tih a ni a; letlingtu Lalrinzuala Pachuau hnenah MWA chuan nimin khan Mizo Language Development Board pisaah lawmman hlan niin, MWA adviser B Lalthangliana'n a hlan.

MWA hian kumin HSLC leh HSSLC-a Mizo subject-a ti ṭha berte hnenah nimin khan lawmman an hlan nghal bawk. HSLC Mizo subject-a ti ṭha ber Vanmalsawmsangi, Sawleng hnenah Lalmama Proficiency Prize hlan a ni a; HSSLC Mizo subject-a ti ṭha ber Anjana Marapawnia Azyu, Siaha Meisavaih East leh Melody Lalruatsangi, Ramhlun South hnenah Ch Pasena Proficiency Prize hlan a ni.

Lawmman hlanna inkhawm hi MWA president Rozama Chawngthu-in a kaihruai a ni.