IMR-ah Mizoram dinhmun a ṭha ber

Nimin khan National Health Mission hnuaia RMNCHA buatsaihin Planning & Programme Implementation conference hall-ah review meeting neih a ni a; sorkar kum 2024-25 chhunga Mizorama infant mortality rate chu 15 niin, India rama IMR dinhmun ṭha ber a nih thu tarlan a ni.

Ṭhutkhawma tarlan danin, nausen kum 1 hnuai lam thi zat tehna IMR-ah kum 2024-25 chhunga Mizoram IMR chu 15 a ni a; nau piang 1,000-ah naute kum 1 hnuai lam 15 an thi tihna a ni. India sorkarin survey a tihchhuah hnuhnung ber Sample Registration Survey-ah chuan Mizoram IMR chu 3-ah dah a ni a, India ramah a hniam ber.

Nausen thla 1 hnuai lam thi zat tehna - neonatal mortality rate-ah Mizoram chu 9 (nau piang 1,000 zelah nausen thla 1 hnuai lam 9 an thi) a ni a; naupang kum 5 hnuai lam 1,000 zelah 19 an thi anga chhut a ni. Kum 2024-25 chhungin nau chungah nu 18 an thi bawk.

National Health Mission (NHM) mission director Dr Lily Chhakchhuak chuan, Sample Registration Survey bulletin thar ber May 2025-ah Mizoram IMR chu 4 a nih thu sawiin, India ramah Sikkim leh Manipur nen pakhatna kan ni. IMR target hi National Health Policy 2017 chuan kum 2025-ah chuan 16 aia sang lo tur leh SDG 2030 chuan 12 turin a ti a, Mizoram chu kan ni sa tawh a ni," a ti.

Dr Lily Chhakchhuak chuan, nau chunga nu thihna tehna maternal mortality rate (MMR)-ah India ram pum dinhmun chu 97 (nau hring nu 1,00,000 zelah 97 an thi tihna) a nih thu sawiin, "Mizoram chu population a tlem avangin chhûtsak kan ni ngai lo. MMR nikumah 18 kan nei a, kum hmasaah 24 kan nei," a ti a; nau chunga nu thihnate uluk taka chhui ṭhin a nih thu a sawi.

NHM Mission Director hian sorkar laipui buatsaih, nau pai, nau pawm leh naute hriselna chungchanga hriattirna thawnna ‘Kilkari’ a tlangzarh.

Review meeting-ah hian Health department district tina chief medical officer, medical superintendent leh hotu dangte an tel a; Reproductive and Child Health (RCH) state programme officer Dr S Thaizi-in RMNCHA chungchang leh target hrang hranga sawifiah a ni.