Mipui hmakhua ngaiin MUHCS duan a ni - Health Minister

Health & Family Welfare minister Lalrinpuii chuan, Mizoramah lung leh lu/thluak zai leh kal thlak (kidney transplant) a nih theih nan sorkarin hma a lak mek thu leh, mipui hmakhua ngaiin Mizoram Universal Health Care Scheme (MUHCS) duan a nih thu a sawi.

Health Minister hian nimin khan Directorate of Hospital & Medical Education (DHME) auditorium-a Mizoram State Health Care Society buatsaih 'Performance Review Meeting on MUHCS Implementation-ah thu sawiin, "MUHCS hi mipui hmakhua ngaia duan a ni. A awlsam zawng ngaihtuah ni ila sorkara bill thehluh hnua pawisa hmuh let theihna (reimbursement) kan kalpui thei reng. Mahse, mipui hmakhua kan ngaih avangin pawisa pek ngai lo (cashless) kalpui a ni," a ti.

Mizorama inenkawlna tihchangtlun mek a nih thu sawiin Lalrinpuii chuan, "ZMCH-ah ICU 13 siam belh tur leh cardio thorasic leh neuro surgery unit din thar tur te, Civil Hospital, Aizawlah kidney transplant lam din turtein hmalak mek a ni," a ti a; Japan International Cooperation Agency hnuaia Mizoramin cancer superspeciality hospital a neih tur chak taka kalpui mek a nih thu a sawi.

Lalrinpuii chuan, sorkar damdawi-inte thuam ṭha mek zel a nih thu a sawi a, "Nurse 300 leh multi task worker 100 lak thar a ni a, x-ray technician, laboratory technician leh public relations officer-te thlengin lak belh a ni. Health worker 100 lak belh a ni dawn a, infrastructure lamah pawh NABARD hnuaiah primary health centre leh sub-centre eng emaw zat sak ṭhat a ni dawn," a ti.

HFW Minister hian PHC/CHC hotute chu mipui hmangaihna nen tun aia nasa lehzuala ṭan la turin a fuih a; ZPM sorkar chu mipui sorkar, mipui ta, mipui tana ding a nih avangin healthcare system thar an duan chu a hlawhtlin zel a beisei thu a sawi.

MUHCS kalpui tawh dan thlirletna hi HFW principal director Dr Lalthlengliani'n a kaihruai a, MSHCS chief executive officer Dr Biakthansangi'n community health centre leh primary health centre-te hmalak dan a tarlang. Mizorama CHC leh PHC-a thawktute'n MUHCS an kalpui dan leh harsatna an tawhte an sawi a ni.