Chief Minister's Award 2025 sem a ni; Literacy-ah kan sang ber dawnin kan hria - CM

School Education department chuan nimin khan Vanapa Hall-ah kumin High School Leaving Certificate (HSLC) leh Higher Secondary School Leaving Certificate (HSSLC)-a ti ṭha ber (topper)-te hnena Chief Minister's Award hlanna inkhawm an buatsaih. Khuallian chief minister Lalduhoma chuan, Mizoram chu India rama ziak leh chhiar thiam tamna ber state a ni dawna an hriat thu a sawi.

Chief Minister's Award hi kumin HSLC-a topper leh HSSLC-a stream tina topper ṭheuh hnenah hlan a ni a, award hian Rs 50,000, memento leh thuchei a keng. Inkhawm hi School Education director Angela Zothanpuii'n a kaihruai a; Education minister Dr Vanlalthlana khualzahawm a ni.

CM Lalduhoma chuan, Mizoram chu ziak leh chhiar thiam tamna state a nih thu sawiin, "Report thar ber a chhuak dawn hnai a, India rama ziak leh chhiar thiam tamna ber state kan ni dawn niin kan hria. Ziak leh chhiar thiam tamna ber state, chhawr tlak lehkhathiam tlemna ni si kan ni ang tih a hlauhawm," a ti a, chhawr tlak nih tum turin zirlaite a chah.

Zirna sang zawkah Mizo ṭhalaite an kal nasat a ṭul thu leh Mizoramin scientist leh researcher a la ngah tawk loh thu sawiin Lalduhoma chuan, "Zirna lamah sorkarin ngaihtuahna kan sêng nasa a, kan sum leh pai dinhmun mila kal a ngai a, chak taka thil tih zung zung a har. Sorkar hi kan tumah kan chiang a, kan phak tawka a ṭha ber neih tumin kan kal a ni," a ti.

Education minister Dr Vanlalthlana chuan, topper-te zir chhunzawm tur chu an tuina lam ni thei se a duh thu a sawi a, "Tunlai chhuante hi artificial intelligence (AI) nena seilian in ni tawh a, AI nen hnathawh tur in la inchuh dawn a, in taimaka in hriam em em a ngai a ni," a ti a, theihtawp chhuah turin zirlaite a fuih.

CHIEF MINISTER SAWI DANGTE

* CM Award hi sorkarin HSLC leh HSSLC-a topper-te kan ngaihhlutzia leh an kal zelna tura kan duhsakzia tihlanna a ni a, huang dangah pawh kan sem zel dawn.

* Ramin resource a neih ropui ber chu human resource a ni.

* Ram mipuite hriatna leh thiamna lama an san chuan natural resource nei ṭha lo mah ila, ram dang aṭanga raw material-te la lutin ram hausa takah kan indin chhuak thei.

* Zirlaite;n social media in hmang thiam lo ang tih ka hlau. Hlawhtlinna leh hmasawnna hi click chhuah a ni lo a, thawh chhuah chi a ni.

* Mobile phone, computer leh TV-in a tihbuai zirlai tam tak, an hun tam ber screen hmaa hmang ṭhin kan ngah.

* Kan topper-te in thawhrimna a entawn tlak ka ti a, ka chhuang che u.