HFW department-a thawkte zingah a nghet aiin nghet lo an tam zawk

Health & Family Welfare department leh World Bank hotute chuan May 8, Ningani khan Directorate of Hospital & Medical Education (DHME) auditorium-ah damdawi-in inrêlbawl dan, damlo enkawlna ṭha zawk neih dan tur leh thawktu indaih loh vanga harsatnate sutkian dan turte an sawiho. HFW department-ah thawktu nghet aiin nghet lo an tam zawk tih tarlan a ni.

Ṭhutkhawm hi Mizoram Health Systems Strengthening Project (MHSSP) bultuma neih a ni. Mizoram HFW department-a thawkte chungchang MHSSP zirchiannaa a lan danin, HFW department-ah hian thawktu nghet (regular) aiin nghet lo an tam zawk a; Mizoram state health budget zinga 68% chu thawktu hlawh atan hman a ni ṭhin.

Health department hnuaia thawkte thuam chak kawngah policy mumal tak duan a ṭul thu te, medical lam zirna-in neih belh te, thawktu lak rêng rêng training mumal tak neihpui hmasak a ṭul thu te, training-na tur hmun bik leh hmanraw ṭhate neih a ṭul thute MHSSP zirchiannaah tarlan a ni bawk.

MHSSP project director Dr Lily Chhakchhuak, NHM mission director ni bawk chuan, MHSSP hmalaknain sorkar damdawi-inte tihchangtlun a nih thu a sawi a, "Kan damdawi-in 18-in National Quality Assurance Standard (NQAS) certification an hmu tawh," a ti a; mipui tan a ni tih hriaa theihtawpa ṭang zel turin thawktute a chah.

World Bank consultant Dr Lincoln Chowdhury chuan, Mizoramin damlo enkawlna ṭha zawk pekah hmasawnna nasa tak a neih thu leh hmarchhak biala ti ṭha ber a nih thu a sawi a, "State dang tan pawha entawntlak tak in ni," a ti a; hmasawn zel theih dan turte a tarlang bawk.

Sawihonaah hian HFW Principal Director office, Directorate of Health Services, DHME, Directorate of AYUSH, Directorate of Nursing, ZMCH, Aizawl East leh West CMO pisaa hotute an tel a; World Bank aṭangin health economist Dr Aarushi Bhantnagar leh consultant pahnih Dr Lincoln Chowdhury leh Ranjeeth B Kumar te an tel.