MYC-in Incentive Cash Award a sem

Mizoram Youth Commis­sion (MYC) nimin khan Vanapa Hall-ah zirlai ti ṭha zual leh ṭhalai, exam-na hlawhtling, chhawmdawl tlaka ngaihte hnenah Incentive Cash Award an hlan. Deputy chief minister Tawnluia'n hmanpuiin, MYC hmalak dan tur inziahna MYC Road Map & Action Plan a tlangzarh nghal.

Deputy Chief Minister chuan, MNF sorkarah ṭhalaite chawikanna, tihhmasawnna leh anmahni kutkawiha eizawnna an hmuh theihna ruahmanna tam takah a awm a, hmalak mek a nih thu sawiin, "Zirna lam leh infiamna khawvel huangah ṭan lâk zual zel a ni dawn. Lehkhathiam ṭanpui tlakte ûm zui zel a ni dawn a, sport huangah pawh incentive cash kan buatsaih zel dawn," a ti.

Mizo ṭhalaite nun dan phung inthlak danglam ta chu tunlai khawvelin a ken tel hriatthiam a ngai tih sawiin Tawnluia chuan, "Ṭhalaite chher hlawhtling tur chuan an rilruah tumruh leh taimaknate tuhsak a pawimawh tih sorkarin a hria a, cho phûr leh an theihnate phawk chhuak turin hma kan la mek zel a ni," ti a; India ramah eizawnna tam tak awmah Mizo ṭhalaite an hlawhtlin theihna turin MYC kaltlangin Mizoram sorkarin policy mumal tak a siam tih a sawi.