PHE Minister-in tui pût leh liam a enfiah

PHE minister Prof. Lalnilawma chuan nimin khan Khatla South-ah tui sem laia tui pût (leak) ṭhinna leh tui liam ṭhinnate a hmunah a enfiah. Minister chuan, tuizêm khah hnu pawha tui haw tihtawp nachang hre loa tiliam ṭhinte hremna dan siam a ṭula a hriat thu a sawi.

Prof. Lalnilawma chuan, sorkarin sum tam tak sengin mipui hnenah tui thianglim a sem ṭhin tih sawiin, "Mipuiin tui man pe mah se, khua leh tui ṭha nihna angin mipuiin tih tur kan nei ve a, chu chu tui ren nachang kan hriat ṭheuh hi a ni," a ti.

PHE Minister chuan, "Tui dah khawlna a khah vek tawh hnua pawha a bill kan chawi a lawm tia connection off nachang hre lo, tui tiliam ṭhin an awm a, hetiang hi kan bànsan a hun tawh. Tui tiliam fo ṭhinte hremna dan siam pawh la ngaihtuah a ṭulin ka hria," a ti a; mipui tam zawkin tui ren leh hlutna nachang an hriat tawh laiin, mi ṭhenkhat chuan hlut nachang an hre lo tih a sawi.

Tui pût leh tui liam chu PHE-in an ngaimawh thu sawiin Lalnilawma chuan, "Tui pût report-na, Water Leak Reporter App siamin, ṭangkai taka chhawr mek a ni," a ti a; tui a hawin tuizem a khah tawh chuan titawp ṭhin tur te, pipe leak a awmin rang taka PHE thawkte hriattir tur te, connection line-ah tui pût a awm leh awm loh vil ṭhin turin mipui a ngen.

PHE Minister hi PHE department hotute'n an ṭawiawm a ni.