Excise-in special drive an nei ṭhin; Kuminah heroin kg. 23.593 man tawh

Excise and Narcotics Department (END) chuan tunlai hian Mizorama district tinah zan tin special drive an nei a, zu leh ruihhlo dap chhuah tumin hma an la ṭhin. END hian kuminah May 8, Ningani thleng khan heroin kg. 23.593 an man a ni.

END chuan thuchhuah siamin, "Tlawmngai pawl hrang hrang, Central YMA (CADS) bakah, YMA branch te, YLA, MTP-te bakah, khawtlang mipui thawhpuina ṭha tak an dawng ṭhin a, END hnathawkte kan lawmin min tiphûr hle," an ti.

END hian kumin January 1 aṭanga nimin May 8, Ningani thleng khan heroin kg. 23.593 leh methamphetamine kg. 44.111 an man a, rakzu litre 25,862.640 leh sapzu tam tham tak an man bakah, ruihhlo dang eng emaw zat an man bawk. Ruihhlo an man kaihhnawiah hian mi 2,737 an man a ni.

END chuan, END-a constable 15 lak thar tura dilna hawn mek chu sorkarin constable dang pek belh a tum avangin sût rih a nih thu tarlangin, "Advertisement thar chhuah hnuah dilna form lak ṭhat leh tur a ni," an ti a; application fee pe tawh tan an thehluhna aṭangin lak let theih a nih thu an tarlang.