HSSLC Exam 2020 hmabak Zirlai 4,700 vel an la awm

School Education minister Lalchhandama Ralte chuan nimin khan inkhârkhip laia zirlai leh zirtirtute tan School Education leh SCERT-te'n ruahmanna an siam leh HSSLC exam la zo lote tana exam chhunzawm hun siam a sawifiah. Minister chuan, HSSLC exam hmachhawntu zirlai 12,609 zinga 4,700 vekin exam an zawh hman loh thu a sawi.

Lalchhandama Ralte chuan, zirlaite'n inkhârkhip hun an hman ṭangkai theih dan tur department-in a ngaihtuah tih sawiin, "Online-a zirna an chhunzawm theih dan turte leh thil hrang hrang kalpui theih dan tur ruahmanna kan siam a, April 13 aṭanga tunkar chhungin ni tin tlai dar 3-5 inkarah DDK, Aizawl kaltlangin pawl 10 zirlaite tan online tutorial class ṭan a ni," a ti. Online tutorial class chu LPS 1-ah tlai dar 4 leh ZONET Zawlbukah tlai dar 2-ahte chhuah ṭhin tur a nih bakah, YouTube-ah en theih a nih bawk thu a sawi. Lalchhandama Ralte chuan, HSSLC exam zawh nan ni thum chauh a awm tawh tihah inkharkhip puan a ni a, exam hmachhawn zirlai 12,609 zinga 8,000 velin exam an zo hman a, zirlai 4,700 velin subject pakhat ṭheuh an la hmabak thung tih a sawi a, "Exam hi centre 84-ah chhunzawm tur a ni," a ti.

Education Minister sawi danin, zirlaite'n an hun âwl ṭangkai zawka an hman theih nan SCERT-in Edu Challenge 2020 an buatsaih a; primary school zirlai tan 'Lockdown' tih thupui hmanga poster insiamsiak, middle school zirlai tan 'Covid-19 laka inven dan' tih thupui hmanga poster insiamsiak, P/S zirtitute tan 'Innovative practice in teaching' tih hmangin video clip tâwi insiamsiakte buatsaih mek a ni. Department hotutute nen Samagra Shiksha conference hall-ah Samagra Shiksha Annual Work Plan leh Budget 2020-21 an sawiho bawk.