Mizoramah Nurses Day hman a ni; Minister-in hlimna thlentu ni turin a chah

Nimin May 12 kha International Nurses Day a ni a, Mizoram hmun hrang hranga nurse-te'n an lawm. Health minister Lalrinpuii chuan, nurse-te chu damlo enkawl dam mai bakah, an lawmna leh hlimna thlentu ni zel turin a chah. Kumina Nurses Day thupuin chu 'Our Nurses. Our Future. Caring for nurses strengthens economies' tih a ni.

International Nurses Day hi Mizorama damdawi-in hrang hrangah leh nurse zirna-in hrang hrangah hman a ni a; Nurses Day pual hian May 5 aṭang khan Nurses Week hman niin, hmun hrang hrangah khawtlang tana thil ṭha tihna hun hman a ni.

Damdawi-ina damlo awmte leh home/centre hrang hrangah ṭanpuina eng emaw zat an hlan a; a thlawna hriselna dinhmun enfiahna leh a thlawna damdawi pek chhuahna hunte hman a nih bakah, intihhlimna hunte hman a ni bawk.

Health minister Lalrinpuii chuan, Mizorama nurse-te Nurses Day chibai bûkin, duhsakna a hlan a, "Damlo enkawl dam ringawt ni loin, an thinlung lawmna leh hlimna thlentu ni zel turin International Nurses Day-ah hian ka ngen a che u," a ti a; ṭawngṭaina nen damlote enkawl a, an rilru damna thlenga ngai pawimawh turin nurse-te a chah.

Lalrinpuii chuan, kumina Nurses Day thupui chu mipui healthcare nen a inmil hlea a hriat thu sawiin, "Mipui khawsak harsatna tizualtu dam lohna senso chu sorkarin a kutken ta a, mipui sorkarin mipui a hmangaihna vang a ni," a ti.

Nurse-te chu healthcare system-a dinhmun pawimawh ber changtu an nih thu sawiin, "In inpekna leh thawhrimna, zan lam thlenga damlo enkawla tlaivar ṭhin in nihna te, hmun kilkhawr ber aṭanga damdawi-in lian ber thlenga damlo enkawltute in nihna hi sorkarin a hre reng a ni," a ti a; damlo enkawlnaah theihtawp chhuah thar leh tur leh nurse hna thawk ṭha chawimawina Florence Nightingale Award dawng thei khawpa thawk turin a fuih bawk.

International Nurses Day hi Civil Hospital, Aizawl (CHA)-a thawk nurse-te chuan nimin chhun khan CHA conference hall-ah an hmang a, nursing superintendent H Vanlalhluni'n kaihruaiin, khuallian Mary Ramte Pachuau-in thu a sawi. Nursing superintendent Lalrintluangi'n thupui a sawi a, nurse thutiam sawi rual a ni a; chawhnu lamah intihhlimna hun an hmang.

Aizawl College of Nursing (ACON) chuan nimin zing khan an awmna Ramrikawn, Tuivamit

veng chhung tihfai hnatlang an neih bakah, faina chungchang inzirtina hun an hmang. Chhung lamah principal Kapzawni kaihhruaiin inkhawm an buatsaih a, assistant professor Julie Vanlalsawmi'n kumina Nurses Day thupui a sawi.

International Nurses Day hi nurse ropui Florence Nightingale pian champha May 12-ah kum tin hman ṭhin a ni. Nurses Day hi ram 138-in an zawm a, World Health Organisation chuan mi 1,000-ah nurse pathum zel an awm tura ngaih a nih thu a tarlang.