Mizoram chhim leh hmar inkalpawhna atan kawngpui dang zawn rawt a ni

Mizoram University (MZU) Research Team, Prof. Brototi Biswas leh Jonmenjoy Barman te kaihhruai chuan Mizoram hmar lam leh chhim lam inkalpawhna kawngpui dang zawn an rawt.

MZU Research Team hian tuna hmar lam aṭanga chhim lam kal pawhna kawngpui awm sa km. 483.50-a thui chu Geographic information system (GIS) hmangin an zir chiang a; kawngpui chu lei min duhna a ni tih hmu chhuakin, tuna kawngpui aṭanga khawchhak lam hretah kawngpui thar siam an rawt a ni.

An sawi danin, an rawtna anga kawngpui siam a nih chuan senso a tlem zawk dawn bakah, leimin a tlem zawk hle tura ngaih a ni. Kawngpui sial tura an rawtna hmun chu ramngaw (open forest) chhungah a ni dawn a, boruak tichhe lo leh lirthei che vel nghawr pawhin pawi a khawih nêpna hmun a ni dawn a, leilung a ngheh zawk avangin a him zawk dawn a ni.

Mizorama kawngpui hrang hrangah fûr laiin leimin a tam ṭhin a; leilung nghet lo-ah kawng laih a nih avangin ram leilung leh a behbawmin nasa takin a tuar a, lei a min phah ṭhin. Mizoram leilung an zirchiannaah hian lung chang awm lohna hmuna kawngpui sialin leimin tam tak a siam tih an hmu chhuak a ni.