Chhim lama airport siam tumin Hmun 11-ah ram enfiah a ni tawh

Mizoram chhim lama airport siam tuma hmalaknaah hmun 11 endik a ni tawh a, airport siam theihna tur ram duh ang hmuh a la ni lo a; hmun pahnih en leh tura ruahman a ni. Hetih lai hian, Lengpui Airport tana hman ṭangkai turin Hmunpui tlangah Airport Authority of India (AAI)-in Doppler VHF Omni Range (DVOR) bun hna an thawk mek.

Vanglaini palai zawhna chhangin GAD Aviation Wing-a chief consultant Wg. Cdr. Lalzawma chuan, Mizoram chhim lamah airport siam a nih theih nan hmun tam takah ram an enfiah tawh tih a sawi a, "Kan zawng nasa viau tawh a, mahse, airport siam theihna tur hmun
ṭha kan la hmu lo a, remchang a vâng rih hle," a ti.

Wg. Cdr. Lalzawma chuan, chhim lamah airport siam tuma hma an laknaah, Lengpui Airport tiat tal an duh thu sawiin, "Hei hi chhim lam mipuite duh dan pawh a ni," a ti a; an beisei zinga mi, Kawmzawl chu a hnuaiah Lunglei châwmtu PHE tui pipe lian a awm vang leh sawn theih mai a nih si loh avangin a remchang lo a, Saitlûk ram pawh tih tlak a ni lo hrim hrim tih a sawi.

Mizoram chhim lama tlang-dung kal dan chu hmar lama tlangdung kal dan nen a inang lo tih sawiin, Lalzawma chuan, Tuirial Airfield tiat ang tur pawh a váng niin a sawi a, "Helicopter aṭanga aerial survey aṭang chuan kan hmu rih lo. Mahse, kan la beidawng lo a, kan la zawng zel dawn a, Chief Minister pawhin zawng zel turin min duh," a ti.

Lunglei district High Powered Committee (HPC) vice chairman S Laldingliana, MLA hnen aṭanga thu dawn danin, Mizoram chhim lama airport tur zawnnaa ram an enfiah tawhte chu Lunglei district-ah - Kàwmzáwl, Ṭhangte rama Saitlûk, Mualcheng South rama Thlisâm, Lungsen, Lungsen ram, Lungsen rama Vuakmual, Phaileng South ram, Tlangdungsei, Vaisâm leh Bûknuam inkara Saihum tlang, Hnahthial rama Dènlung tlang te a ni.

Siaha district-ah hmun pahnih en a ni tawh a, pakhat zawk chu Mámpui ram a ni. S Laldingliana chuan, hmun pahnih en hmabak an la nei tih sawiin, "Chithar tlang leh Rúntung tlangte en leh kan la tum a. Ruahtui hul veleh helicopter hmangin en leh kan tum a, ruahmanna pawh siam vek tawh a ni," a ti.

Wg.Cdr. Lalzawma chuan, Lengpui Airport tana tláng hnawk tak, Hmunpui tlángah thlawhna kaihruai thei tur, Doppler VHF Omni Range (DVOR) bun hna thawh mek a nih thu sawiin, "An zo ṭêp tawh ang. Bun zawh a nih hunah chuan Lengpui Airport-a thlawhna ṭum tur leh thlawk chhuak tur tan a ṭangkai viau dawn a, international flight-te tan pawh a ṭangkai ang," a ti a; DVOR bun chu AAI-te buaipui a nih thu a sawi.

GAD Aviation Wing-a Chief Consultant chuan, Lengpui Airport chu indona thilah engtik hunah pawh hman theih a nih thu sawiin, "India rama airport zawng zawng hi indona thilah chuan Indian Air Force (IAF)-te'n an duh hun hunah an hmang theih," a ti.

Aviation Wing Chief Consul-tant chuan, IAF-in Lengpui Airport chu indo thlawhna hman ṭangkai theih tura chei an duh a, nikum khan jet fighter-te din theihna tur fighter blast plan pathum leh ORP siam an duh thu an sawi tawh tih a sawi a, "Nikum lamah kan indawr tawh a, mahse, tun thlengin engmah an la rawn sawi leh rih lo," a ti bawk.