India rama journalist upa ber Lalbiakthanga

Mizoram sorkar, Information & Public Relations (IPR) department leh Mizoram Journalist Association (MJA) ṭangkawp chuan, nimin khan Zoram Tlangau editor Lalbiakthanga Pachuau chu India rama chanchinbumi thawk mek (working journalist) upa berah an puang. He hunah hian accredited journalist tharte hnenah accreditation card sem nghal a ni.

India rama working journalist upa ber puanna inkhawm hi IPR Auditorium-ah neih a ni a, IPR secretary B Lalthanliana'n kai-hruaiin, khuallian IPR minister Lal Thanzara'n working journalist upa bera puan hnenah thuchei (citation) a hlan a, accreditation card a sem.

Minister chuan, Lalbiakthanga Pachuau chu kum 90 a tling tawh chunga cahnchinbu a la enkawl thei chu a lawmpui thu sawiin, hriselna ṭha tak nen dam reng a, chanchinbu enkawl zel turin suhsakna a hlan.

Lal Thanzara chuan, accredited journalist-te chu sorkarin chanvo ropui tak pe thei lo mah se, state chhung leh páwnah an phû ang chanvo pek zel dan an ngaihtuah zel dawn thu a sawi a, "Accreditation nih tâkah chuan, chanchin thar ziah kawngah accredited journalist kutchhuak a ni tih hriat theih tura ṭan in lak a ngai a. Belhchian dâwl, innghahna tlak ni lehzual se, social media-ah thu kan post a nih pawhin, puitling tak ni zel se," a ti.

Political party chan-chinbu ni si lo chanchinbua editor-te’n an ṭan lam lang taka thu an ziak ṭhin chu a changkang lo tih sawiin, Thanzara chuan, “A lai thei ang bera ziah a ṭha a, editor-te’n an ngaihdan chu editorial lamah ziah ni se,” a ti a; editorial nei loa chanchinbu chhuah chu a changkang lo tih sawiin, chanchinbute chu editorial nei vek turin a chah.

Chanchinbute chu Mizoram leh hnam darthlalang a ni tih sawiin Minister chuan, “Hmasawn zel tur a nia, inzir zel tur a ni. Cable TV lam pawhin mawhphurhna sang tak an nei. TV-a thlalak tihlan âwm leh âwm lo hriat a ngai a, hmuh nuam lo lang a awm leh ṭhin a, hmuh nuam lo chu tihlan loh a ṭha,” a ti a; social media-ah pawh mi tana hmuh nuam lo thlalak chu post loh a ṭhat thu a sawi.

IPR Minister chuan, accredited journalist-te chu mi puitlinga ngaih an nih thu sawiin, national day leh ni pawimawhah dress code an siamte zawm ve nachang hre tur te, inthuamnaa inuluk turtein a chah a; chanchinbumite hmasawn zel nan sorkarin training buatsaih ṭhin a inhuam thu a sawi bawk.

MJA president Vanlalrema Vantawl chuan, Zoram Tlangau editor Lal-biakthanga Pachuau chu India rama working journalist upa ber nia an hriat avangin ‘Oldest Working Journalist’ ah an puan thu a sawi a, “Kan hriat theih chinah working journalist kan hriatte chu ani aia naupang vek an ni a, ani aia upa an lo awm a nih pawhin, an puang ve leh mai ang,” a ti.

Inkhawmah hian Lalbiakthanga Pachuau chanchin tawi video clip siam chu Minister Lal Thanzara’n a tlangzarh a, video hi Youtube-ah dah nghal niin,

ah en theih a ni. MJA pawhin lawmpuina an hlan nghal.

Lalbiakthanga Pachuau chuan, India rama working journalist upa bera puan a ni chu atan chawimawina ropui tak a ni a, lawmawm a tih thu a sawi rualin, a phu loh chawimawina a nih thu a sawi.