KHAWTHLIR

Eng awm dawn lo

Power & Electricity department chuan thu­chhuah siamin, vawiin hian khuain a zir chuan zing dar 9:30 aṭanga tlai dar 4:30 thleng 33kV Indoor Sub-Station, Aizawl châwmtu 33kV line hrui lian zawk an thlak ngaih dawn tih an puang a, "Hna thawh chhungin Electric Veng, Chhinga Veng, Dawr­pui, Zarkawt, Tuikual South ṭhenkhat, Treasury Square, Chanmari, Chaltlang Dawrkawn leh chhehvel, Ramhlun PWD Mual leh Laipu­tlang ten êng an nei dawn lo," an ti.

Khawmpui hmang

Social Welfare Department Officer Association chuan October 13, 2016 tlai khan BS Farm, Falkland Vengah General Conference an hmang a, Social Welfare minister PC Lalthanliana'n a hmanpui. Minister chuan, thawhhona ṭha tak nen inlungrual taka thawk turin a chah.

Mei zu man

Aizawl District Anti-Tobacco Squad-te chuan nimin khan Aizawl New Market-ah phal lohna hmuna mei zu an awm leh awm loh an enfiah a, dan bawhchhia mi 25 manin pawisa an chawitir nghal.

Intlân chhâwk hun

Traffic SP chuan thu­chhuah siamin, sikul ṭan hun tihdanglam a nih tâk avangin taxi intlân chhâwk hun siam danglam a nih thu a puang. Ruahmanna thar ang chuan, taxi intlan chhawk hun chu October 15 - February 14 chung­in zing dar 9 aṭanga ṭan tur a ni a, February 15 aṭanga October 14 chhungin zing dar 8:30 aṭanga intlân chhâwk tur a ni thung.

Hand Washing Day

Nimin kha Global Hand Washing Day a ni a, Mizoram hmun hrang hrangah he ni pual hian hun hman a ni. Day hmannaah hian zirlai naupangte
hnenah kut sil dan leh kut sil fai a pawimawhnate zirtir a ni a; kum­ina Day thupui chu 'Kut silfai hi chìn ṭhanah nei rawh' tih a ni.