Gas harsatna chinfel hna hi sorkarin A mawhah la ngam rawh se - Tawnluia

MNF senior vice president Tawnluia chuan, tunlaia Mizorama gas harsatna chu sorkar mawh a nih thu a sawi a, "Sorkar dâwngdah vanga thleng a ni a, a chinfel hna hi sorkarin mawh la ngam rawh se," a ti.

Tawnluia hian nimin khan Mizo Hnam Rûnah gas harsatna chungchang a sawi a; "Gas harsat chhan hi sorkar mawh liau liau a ni. Gas harsatnaah hian Congress sorkar hian mawh a la ngam lo a, a tlanchhe zel a. IOC lam te, contractor leh driver tih vel chhuanlama hmangin an béng per zel a ni," a ti a; gas harsa vangin Mizoram mipui an mangang tak zet tawh tih a sawi.

MNF Senior Vice President sawi danin, tun hnaiah MNF Vigilance Committee-te'n Mualkhang Gas Bottling Plant an enfiah a; gas bûr thun khah sa ni tin truck phur 10-12 vel daih a awm reng tih an hmu. Gas chu phurh chhuah lohin a awm nghêk nghûk a, ni khatah truck 3-4 vel chauhin an phur chhuak ṭhin. Kumin July thla hma lamah gas phurtu truck hi 65 a awm ṭhin a, July thla aṭang chuan truck 45 chauhin an phur thei tawh a ni.

Tawnluia chuan, gas phurtu truck tlem ta leh indaih lo ta chu sorkarin July-ah a hre tawh a, mahse, tun thlengin siam rem a tum lo niin a sawi a, "Gas phurtu leh IOC-te hi sorkar hian a nawr kal tur a ni. An duh chuan a hun takah zu an zuar thei a, lei sên loh phur thlengin an tlar tiar tuar theih laiin, engati nge gas an phurh thlen theih loh, tih hi kan zawhna a ni. Mizo Carbon-ah truck thlâwk theite pawh an nei a ni lawm ni, gas phurh nan engati nge an hman loh," a ti.

YMA-te'n gas tichingpentute an man chu fakawm an tih thu a sawi rualin, Tawnluia chuan, YMA-in an mante chu tun thlengin hrem loin an la awm niin a sawi a; YMA-te chu gas harsat chhan an ni lo a, a phurtu truck tlem vang leh phurh theih loh vang a nih thu a sawi.

MNF Sr. Vice President chuan, an party chuan mipui ni tin mamawh an ngai pawimawh tih sawiin, "MNF sorkar lai khan priority kan pe a, 'Gas in lei duh em?' tih ngai khawpa hniang-hnârin kan siam a, mautâm ṭâm lai pawhin buhfai a thlawnin kan sem a ni," a ti a; sorkar hotute chu an mimal hlâwkna tur thil a awm loh chuan thil an tiṭha peih lo niin a sawi bawk.