Lalsawta chan department dinhmun sawiho

Consultative Committee on Finance, Planning, Law & Judicial leh Taxation department chu nimin khan Secretariat conference hall-ah a changtu minister Lalsawta hoin an ṭhukhawm a; department pali dinhmun an thlirho.

Meeting-ah hian Planning & Programme Implementation department-in official data leh statistics dik leh rin tlak a neih theihna tura hma a lak dan sawiho a ni a; Registration of Births & Deaths-ah chuan India rama tiṭha ber an nih mek thu an tarlang.

Science & Technology Directorate tihchang-tlun zel dante leh hmalak chhunzawm dan tur sawi-honaah, an office tur Secretariat Complex-a sak mek chu zawh ṭêp a nih tawh thu sawi lan a ni a; Mizoram Science Centre, Berawtlanga Innovation Hub building sak mek a nih thu leh, Lungleia Digital Planetarium sakna tur sum a awm tawh thu tarlan a ni.

New Economic Development Policy chungchang sawi a ni a, Lok Ayukta din tura hmalak dan thlirho a ni bawk.

Meeting-ah hian minister Lalsawta puitu parliamentary secretary KS Thanga, MLA paruk - PC Zoram Sangliana, K Sangṭhuama, Lalrobiaka, T Sangkunga, Lalruat-kima leh Lalthanliana an tel a; Finance Commissioner leh department hotute an tel bawk.