Chawngte-ah CADC CEM lim an hâl

Chakma Autonomous District Council (CADC) sorkar laka an thil phût tihhlawhtlin a nih loh vanga lungawi loh lantir nan, Chakma tlawmngai pawlte chuan October 13, 2016 khan Chawngte-ah CADC chief executive member (CEM) Kali Kumar Tongchangya lim an hâl.

Central Young Chakma Association (CYCA) leh Mizoram Chakma Students Union (MCSU)-te chuan September 27, 2016 khan CADC sorkar laka kawng hrang hranga an lungawi lohna lantirin Chawngte-ah kawng an zawh tawh a; kawngzawhnaah hian CADC-ah memorandum thehlutin, an thil phûtte tihhlawhtlin nan CADC sorkar chu ni sarih chhung hun an pe.

CYCA leh MCSU-te chuan memorandum an thehluha an thil phûtte chu ni sarih a ral hnu, October 13-ah pawh tihhlawhtlin a la nih loh avangin, Ningani khan Chawngte-a CADC Secretariat kawtah lungawi lohna an lantir leh a; CADC CEM Kali Kumar Tongchangya chu báng tura an phût bakah, a lim an hâl nghal a ni.

Chakma pawl pahnih hruaitute chuan, hun rei tak an nawr hnuah CADC sorkarin dan loa a lak mi 18-te chu kumin August 23 & 24-ah bàn mah se, September 29, 2016-ah an hlawh tipungin hna dangah an thun leh nghal vek niin an sawi. CADC sorkar chu thawktu an lak nawn lehte bàn turin an phût leh bawk.

Ningania Chawngte-a lungawi lohna lantira pungkhawm Chakma mipuite hian, CADC sorkar hmalak dan an ngaichâng reng dawn tih an sawi a ni.