PwD Commissioner atan RR peih a ni tawh

Nimin khan NLUP conference hall-ah rualbanlote chanvo leh hamṭhatna hrang hrang zirhona buatsaih a ni a; khuallian, Social Welfare minister PC Lalthanliana chuan, Persons withn Disabilities (PwD) Commissioner lakna turin Recruitment Rules peih a ni tawh tih a sawi.

PC Lalthanliana sawi danin, PwD Commissioner Recruitment Rules tur hi peih a ni tawh a, Cabinet memo pawh siam a nih tawh. Mizoramin hun eng emaw chen PwD Commissioner a nei tawh lo a, a thar tur lakna atan Recruitment Rules (RR) siam niin, RR hmangin PwD Commissioner thar lak tum a ni.

Social Welfare Minister chuan, rualbanlote'n chanvo an neihte ngaih pawimawhsak a ṭul thu sawiin, "An chanvote hi a taka an chan theih nan vawiina training hi hlawhtling taka hman a nih ka beisei. Sorkar hnaa rualbanlote tana 3% hauhsak chu tunah hian DPAR-in a post an ennawn mek a ni," a ti.

PwD (Equal Opportu-nities, Protection of Rights & Full Participa-tion) Act 1995 chu India ram pumpuia hman tur a nih tih sawiin, PC Lal-thanliana chuan, "Mizoramah pawh a provision hrang hrangte kan hmang ve tawh," a ti a; PwD Act chuan rualbanlote’n khawtlang leh ram pumah mi dangte angin ham-
ṭhatna leh hmasawnna lamah ngaihthah an nih lohna turin an hmakhua a ngaihtuahsak thu a sawi.

Training-a tarlan dan-in, Social Welfare department-in rualbanlote tana hmalakna kalpuiin, Mizoram khaw hrang hrangah Assessment & Certificate Camp an nei tawh a, August 16, 2016 thleng khan mi 10,008 certificate an pe tawh. Rualbanlo zirlai 793 hnenah stipend pek an nih bakah, rualbanlo mi 200 hnenah pension (disability pension) thla tin Rs. 250 an pe a ni.