Kawnpui-Hortoki kawng sawiho Railways siamṭhattir tura tih a ni

October 13, 2016 tlai khan chief minister Lal Thanhawla hoin a pisaah Kawnpui leh Hortoki inkar kawng sawiho a ni a; North East Frontier Railways-te'n an kawng hman china a khuar leh chhe zual laite siam ṭha se, an ti.

Chief Minister chuan, rél kawng sial mek chu Mizoram sorkarin a ngai pawimawh tih sawiin, "He project hi Mizoram tan mai ni lo, ram pum tan project pawimawh a ni a, zawh thuai a nih theih nan theihtawp chhuah mek a ni. Chutih rualin, hna kal mek vanga kawng chhiain Hortoki mipui tan harsatna a thlen hi kan ngaihtuah tel a ngai a, rél kawng sial hna tikhaihlak loa kawng thawm ṭhat a, mipuite harsatna tikiam zawnga ruahmanna siam a nih theih nan meeting hi koh a ni," a ti.

Kolasib DC H Lalengmawia chuan, Railways aiawhte nena meeting an neih tawh dan leh hmalakna awm tawhte a sawi a, "Railways aiawhte'n fûr laia an tan duhthusama kawng khuar hnawh leh kawng thawm ṭhat a harsa chungin, a theih ang angin hma an la a. Kawng hi kum thum tal chu rim taka hman a ngaih dawn avangin thuam ṭhat a pawimawh dawn," a ti a; Railways ho estimate-ah kawng repair leh thuam ṭhat a tel loh avangin kawng thuam ṭhat chu an tan a harsat thu a sawi.

Meeting chuan, a rang thei ang berin Railways-in kawng an hman chin a khuar lai leh a chhe zual lai chu siam ṭha tur leh, an hman chhung chu enkawl zui se, a thawm
ṭhat hna an kalpui dan chu district thuneitute'n vil se, an ti. Railways-in an hman loh chin kawng chu PWD-in a thawm ṭhat hna fûr zawh veleh ṭan nghal se, an ti bawk.

Meeting-ah hian bialtu MLA Hmingdailova Khiangte, PWD engineer-in-chief R Vanlaltluanga, Kolasib SP C Lalzahngoa leh NE Frontier Railways engineer-te an tel a ni.