Covid-19 vaccine chin hriat loh
Covid-19 Medical Operational Team chairman Dr ZR Thiamsanga, MLA chuan Covid-19 venna damdawi (vaccine) sem theih anih hun tur hriat theih a la nih loh thu a sawi.
Vanglaini palai zawhna chhangin Dr ZR Thiamsanga chuan Covid-19 vaccine Mizorama a lo thlen hun tur a la hriat loh thu hi a sawi a, "A thuphung chuan kumthar January-ah lo thleng turin thu kan dawng a, mahse confirm a la awm lo. A rawn thlen hun tur sawi theih a ni lo," a ti.
Dr ZR Thiamsanga sawi danin Covid-19 vaccine hi a lo thlen huna sem theih turin inbuatsaihna peihfel vek a ni tawh. A lo thlen veleh ruahmanna siam sa angin a indawta pek an ni ang.
Covid-19 vaccine dawn hmasak dan turah district hrang hrangah DC-te kaihhruaina hnuaiah ruahmanna siam a ni tawh. Kum upa, natna benvawn nei leh Covid-19 dona kawnga thawktute ngaih pawimawh hmasak an ni dawn.