CM-in hnam inpumkhat nan tawng thuhmun hman tha ti

Chief minister Lal Thanhawla chuan, Zo hnahthlak hnam hrang hrangte'n ṭawng hrang an neihte chu humhalh a ṭul thu a sawi rualin, Mizo ṭawng (Duhlian ṭawng) chu Zo hnahthlak hnamte insuihkhawmna leh phuarkhawmtu atan hman a ṭhat thu a sawi.

CM Lal Thanhawla hian Inrinni khan Lai Students’ Asso-ciation (LSA)-in Vanapa Hall-a zirlai thar lawm luhna hun an buatsaih a hmanpuinaah thu sawiin, "Hmun hrang hranga awm Zo hnahthlakte hian ṭawng hran kan nei a, heng kan ṭawngte hi vawnghim chho chungin, insuihkhawmna atan Duhlian tawng kan hman a ṭha a, min phuarkhawmtu Duhlian ṭawng atan theihtawp kan chhuah a pawimawh a ni," a ti.

Lal Thanhawla chuan, Zo hnahtlakte chu Pathian ringtu nihnain a phuarkhawm tih sawiin, "Inpawh taka, inhmangaih leh inpui tawn a, inlaichinna leh inunauna thûk zawk kan neiha kan insuihkhawn zel chuan hnam ropui leh zahawm kan ni thei a, mi dangte lakah kan zuamawm lo thei dawn a ni," ti a; Zoram leilung fate zingah Mizoram chhungah minority an awm lo tih sawiin, a neitu an ni vek a, ram siamna kawngah mawhphurhna inchen an nei vek tih a sawi.

Zo hnahthlak ram luah chin chu khawvela sakhaw lian pathumte'n an hual tih sawiin, CM Hawla chuan, "Khawiah pawh awm ila, Pathian ram ropui-na, ram zauna leh a rawng-bawl tur atan min hûnna a ni tih pawm a, rinawmna, dikna, taimakna leh amah hriatna nung nen kan kal zel a pawimawh," a ti.

Lal Thanhawla chuan, Act East Policy kal mekah India-in Mizoram a hawi mek thu sawiin, "Ram dang nen insumdawn tawnna kawnga chak taka hmalak mek a ni," a ti a; insumdawn tawnna chuan Chanchin Ṭha hrilna kawng leh a put darhna kawng a hawng dawn tih a sawi.

Chief Minister chuan, Mizo-ram sorkarin ṭhalai leh zirlaite hmakhua ngaihtuahin ṭhalaite tan khawvel thar an buatsaih mek nia sawiin, Mizoram Youth Commission kaltlanga sorkar hmalaknate chu hmang ṭangkai turin LSA member-te a chah a, "Mizoramah sorkar hna a vân tawh a, ram danga thawn chhuah leh chhawr theih tur zirna ṭha leh mahni kea dinga eizawnna neihte hi kan ngaih pawimawh a hun tawh a ni," a ti.

Inkhawm hi Lai Autonomous District Council chief executive member VL Hmuaka leh exe-cutive member dang pahnihte'n an hmanpui a; Chief Minister-in LSA member, zirnaa hlawhtling bik mi 19 hnenah LSA-in lawmpuina thuziak an buatsaih a hlan a ni.