Cheng nuai 450 hû rangkachak man

Champhai police-te chuan October 13, 2016 zing dar 8 vel khan Myanmar aṭanga lak luh nia hriat, rangkachak tlang 150, cheng nuai 450 chuang hû an man a, a neitu nia hriat an man bawk.

Thu dawn danin, rangkachak tlangte hi Vanmalsawma (30) s/o Tlanlawma (L), Dinthar, Aizawla khawsa nia insawi hnen aṭanga man a ni. Vanmalsawma'n Maruti van hmanga Champhai aṭanga Aizawl panpui a tum laiin Champhai dâia Khankawn police checkgate-ah police-te'n lo tidingin an enfiah a, motor seat hnuaia thuhrûk rangkachak tlangte chu an hmu chhuak ta a ni.

Vanmalsawma hian Myanmar-a Lepanchhawng khaw chhuak a nih thu leh Dinthar Vengah hun eng emaw chen a khawsak tawh thu a sawi. Court-ah hruai a ni tawh a, Magistrate remtihnain police-te'n thu zawhfiah atan darkar 48 chhung an kawl a ni.