Motor-in mi pali a hnawl, mi 1 a thi

October 15, 2016 zan dar 7 vel khan Aizawl lam pana tlan XUV car MZ-01 M-8604 chuan Damdiai, Maubuangah kawng sira awm mi pali a hnâwl a, mi pakhat a thi. Motor khalhtu hi man a ni tawh a, police-in an kawl mek.

Motor khalhtu hi Lalremruata (26) s/o F Lalchamliana (L), Bungkawn, Aizawl a ni.

Thu dawn danin, motor hian mihring pali bakah, scooty leh tuizémte a hnâwl bawk a; a tlân tlang avangin Damdiai khaw mite'n Sateek khaw mite phone-in an hrilh a; Sateek khaw mite chuan kawngpui kham zawnga motor dahin an lo tiding a, motor-a chuangte chu an man a ni.

Maubuang YMA secre-tary PC Lalchhan-chhuaha hnen aṭanga thu dawn danin, motor-in a hnawl zinga mi, Zopari w/o Remthanga, Damdiai chu Inrinni zan vek khan a hliam tuar loin a thi.

Zopari laizáwn fanu, Rebe-cca Lalbiaknii, Lengpuia pasal nei leh a fate pahnih - Malsawmtluangi (4) leh Jonathan Hming-thantluanga (thla hnih)-te chu hliamin, damdawi-inah enkawl an ni.

Motor-ah hian a khalhtu nen mi paruk an chuang a, mipa pahnih leh hmeichhia pali an ni a; Ṭhiak khuaa birthday lawma kal an ni.

Sateeka man an nih hnuah, in pakhatah dah an ni a, an hmel hmu duh mi
ṭhahnem tak pungkhawm mah se, harsatna leh buaina lian tham awm loin police-in nimin zing dar 2 vel khan police station panin an hruai chhuak tih Police hotute chuan an sawi.

Bialtu MLA, parlia-men-tary secretary KS Thanga chuan vanduaina tawkte chu Inrinni zan khan State Referral Hospital, Falkawnah a kan a ni.