KHAWTHLIR

Lusun khawhar

K Lalthlamuana, Ramnuam daily news paper Editor, New Diakkawn, Kolasib chu nimin chawhma dar 9:35 khan Kolasib hospital-ah zunthlum natna vangin a thi a, vawiin chhun dar 12 ah vui a ni ang. K Lalthlamuana hi Kolasib district MJA president pawh lo ni tawh a ni a, a nupui Rengthangpuii bakah fapa pahnih leh fanu pahnih a kalsan.

Thisen pe

Inrinni khan Mission Veng Branch KṬP chuan blood donation camp an huaihawt a, Synod Hospital tan mipa 53 leh hmeichhia 13-te'n thisen unit 66 an pe. Model Veng Branch KṬP-in Aizawl Civil Hospital tan thisen unit 37 an pe, a petute mipa 33 leh hmeichhia pali an ni. Lunglei Lunglawna awm 1st. Assam Rifles sipaite'n Lunglei Civil Hospital-ah thisen unit 29 an pe bawk.

Award hlan

Dalmia Bharat Cement chuan, Champhai district-a Dungtlang khuaa Pípu Sûlhnu Humhalhtu Pawl chu pípúte sulhnu an humhalh ṭhat avangin Young Achievers Award an hlan. Award hi tun hnaia Aizawla ‘Mizoram: Gateway to Southeast Asia’ tih thupui hmanga international seminar neihah hlan a ni.

Choir Convention

Bible Society of India (BSI), Aizawl Auxiliary Youth Committee buatsaihin, Inrinni zan aṭanga nizan thleng khan Salvation Army Aizawl Temple Corps-ah BSI zaipawl hrang hrangte pualin 'Choir Convention' neih a ni. Choir Convention-ah hian BESY Choir bakah, Mizoram hmun hrang hranga BSI puala zaipawl din 18-te an tel a; zaipawl hrang hrangte chuan Pathian fakna hla an rem a ni.

Kawng enfiah

Parliamentary secretary TT Zothansanga chuan Inrinni khan a bial chhunga North Khawbung khaw kawng a enfiah a, kawng chhe laite chu siamṭha turin PWD-te a hriattir. TT Zothansanga hi PWD executive engineer Vanlaldika'n a
ṭawiawm a, kawng chhe laite chu ruahtui hul veleh siam tum a ni.

Pípúte thufing târ

Mizo Historical Village Committee (MHVC) huaihawtin, Inrinni khan Chawngtlai khuaa Sahlâm hmunah Chawngtlai khaw chhung hmun hrang hranga Mizo pípúte thufing târ bul ṭanna hman a ni a, bialtu MLA Lalrinliana Sailo-in a hmanpui. Lalrinliana Sailo chuan, pípúte serh leh sâng chu tunlai thleng pawha palzût chi loh tam tak a la awm tih sawiin, "Mizo pipute serh leh sâng hi humhalh a, tunlai nun nena inmilte chawi nun zel a ṭul a ni," a ti.

NLUP sem

Minister of state Lalrinmawia Ralte chuan, Inrinni khan a bial chhunga Tuidam Community Hall-ah Horticulture department hnuaia NLUP third phase leh fourth phase hnuaia kuhva, serthlum leh lakhuihthei thlangtu mi 446 hnenah ṭanpuina Rs. 30,30,500 a sem. Minister chuan, "NLUP hi mi harsate khai chhuahna scheme ṭha ber a nih avangin sorkar laipui pawhin tha a ti a, kalpui a nih zel theih nan sum a rawn pe chhuak zel a ni," a ti.