Mitdel tiang hawlte zah turin mipui ngen

Mizoram Blind Society chuan October 15, White Cane Day pualin thuchhuah an siam a; Mizoram mipui, a bikin lirthei khalhtute chu mitdel tiang hawl, khawlaia an hmuh chuan ṭanpui ngai leh an tiang kente zahsak turin an ngen.

Mizoram Blind Society chuan, "Zoram mipuite, a bikin lirthei khalhtute zawng zawng mitdel tiang hawl, khawlai an hmuh chuan ṭanpui ngai leh an tiang ken zahsak tur a ni tih hre thar turin kan ngen a che u. White Cane Day pual hian MB chuan dan leh thupek kengkawhtute leh lirthei khalhtute an fimkhur zawk theihna turin Traffic SP leh Zoram Drivers Union President hnenah ngenna ziakin kan thlen a ni," an ti.

MBS tarlan danin, thlalaka eizawng James Biggs chu kum 1921-ah accident vangin a mit a del a, a mitdel hnuah khawlaia a chhuah chángin tiang vâr a hawl ṭhin. A tiang hawl, rawng var a hnawih chhan chu lirthei khalhtute leh kawtthlera veivakte'n amah chu khaw hmu lo, mitdel hriatthiam ngai a ni tih awlsam taka hriat theih nan a ni.

James Biggs tiang hnawih var chu a ṭangkai avangin khawvel hmun dangah pawh an la ti ve ta zel a, USA-a The National Federation of the Blind-in White Cane Day hman an rawt hnuah, kum 1964 aṭangin October 15 chu White Cane Day-ah puan a ni ta a ni.