Mi tlawmngaite'n sangha fuan veng

Tunlai hi sangha fuan hun a ni a, Mizorama lui hrang hrangah a bul hnaia khuate chuan miin sangha fuan an rût tur an veng a, lui an humhalh.

Khawchhak Tuipui tlawh chhan khaw hrang hrang - Biate, Khawbung, Léng, East Lungdar, Sailulak, Zawlsei, Khuangthing leh Bungzung khuate chuan Tuipui fintu lui têa nghafuan man a nih loh nan October thla tir aṭang khan lui an veng ṭan a, November 15, 2016 thleng ven an tum.

Biate YMA hruaitute sawi danin, Biate khaw rama Hmunte lui leh Khawbung rama Tlaikuang luiah chuan nghalim tui tur a fuan ṭan tawh a, sangha fuante chu miin an man loh nan Biate khaw YMA member mi 15 velin him takin an veng a ni.

Serchhip district-a Hmunzawl leh a chhehvel khuate pawhin Tuichang lui aṭanga nghalim tui tur, a fintu lui têa fuante chu véngin an humhalh a; Samlukhai leh Ṭhiak khuate pawhin an khaw ram chhunga Chângte lui leh a fintu lui danga nghafuan him taka an tui theih nan October 14 zan aṭang khan an veng ṭan a, November thla tawp thleng vèn an tum. An khaw chhehvela mite leh khaw dang mite chu an lui humhalhah sangha man lo turin an ngen a ni.