Bru lak lêt a hlawhtling dawn - Union Home Minister

Union Home minister Rajnath Singh chuan, Mizoram aṭanga Bru ráltlan, Tripura refugee camp-a awmte Mizorama hruaik kîr tum chu a hlawhtling ngei dawn niin a sawi.

Rajnath Singh hian nimina Hotel Mount View, Chandigarh-a Regional Editor Conference a hawng a; Vanglaini palaiin Bru hruai kir tum mek chu hlawhchham leh se, hruai kîr tum nawn an nih dawn leh dawn loh a zawhna chhangin, "Bru hruai kir tur hian theihtawp kan chhuah a, a hlawhtling ngei dawn tih ka chiang," a ti. Bru lâk lêt hna hi November 2016-ah ṭan leh tur a ni.

India hmarchhak state zingah Mizoram, Tripura leh Sikkim-te chu a rálmuan thu sawiin, Rajnath Singh chuan, "Arunachal Pradesh-ah thil thleng tlem a awm a, mahse, a rálmuang tho. Assam-ah chuan civilian laka tharum thawhna a pung a ni," a ti a; hmarchhaka hel pawlte nen inremna a awm theih nan sorkar laipuiin ruahmanna a siam thu a sawi.

Home Minister chuan, Myanmar leh Bangladesh ramri aṭangin India ramah ruihhlo, pawisa lem leh ram dang mi an luh nasat thu sawiin, "Ramri venhim hi hmarchhakah a harsa zual. Ram pathum nena inrîna a nih bakah, a chhengchhe lutuk a. Heti chung hian ramriah theihtawp kan chhuah. Border management ṭha kan ngai pawimawh hle a ni," a ti.

Conference-a Ministry of Home Affairs dinhmun tarlanna an sema a lan danin, Mamit district-a Dampa Tiger Reserve huam chhung km. 57-a thuia ramri hungna, kawng leh outpost siam tuma forest clearance-a harsatna awm chu chinfel a ni tawh a, hnathawh thuai tum a ni.

Conference-ah hian chawhnu lamah Women & Child Development minister Maneka Sanjay Gandhi chuan a ministry hnuaia an hmalakna hrang hrangte a tarlang.

Maneka Gandhi chuan, kum thar aṭangin hmeichhiate tan buaina an tawha hmeh tur (panic button) awm mobile phone hman a nih tur thu te, hmeichhiain harsatana an tawha an pan tur One Stop Centres district tina din tur chu district ṭhenkhatah din ṭan a nih thu te, Parliament-a pharh turin 'Trafficking of Persons (Prevention, Protection and Rehabilitation,) Bill duan a nih tawh thute leh, naupangin chaw leh zirna ṭha zawk an dawn theihna atan anganwadi kalphung thlak a nih tur thute a sawi.

Regional Editors' Conference-ah hian India khaw chhak lama chanchinbumite an tel a, vawiinah chhunzawma khâr a ni ang.

Conference-ah hian Mizoram aṭangin Zalen editor Vanlalrema Vantawl leh Vanglaini news reporter Malsawmdawngzela Hrahsel te an tel a ni.