MNF MLA-te'n gas bottling plant an tlawh Transporter tel loin gas a phurh theih dawn

MNF MLA-te leh an hruaitu ṭhenkhat chuan nimin khan Mualkhang Gas Bottling Plant an tlawh a, IOC Manager hnenah Mizorama gas harsatna thleng mek chingfel thuai turin an ngen. IOC manager Ranjit Basumatary chuan, an remchan dan anga gas phur turin gas agency-te hriattir an nih tawh thu a lo hrilh.

MNF MLA-te hian Mualkhang Gas Bottling Plant-a Manager chu gas dinhmunte leh Mizorama gas harsat chhante an zawtfiah a; Manager chuan, Mualkhang Bottling Plant-ah gas a awm tam tâwk a, state páwn aṭanga gas lak luh kawngah harsatna an neih loh thu a sawi a, "Kan harsatna ber chu gas phur tur truck awm lo hi a ni. Truck awm se chuan ni khatah truck phur 15 kan pe chhuak thei a, mahse, vawiinah pawh truck phur sarih chiah kan pe chhuak thei a ni," a ti.

MNF MLA-te chuan Mizoramah gas a harsa em em a, Mizo mipuite an ṭâm mek thu sawiin, ruahmanna lailâwk (emergency arrangement) siam tura an ngen bakah, a theih bak phiah lam a nih pawhin, IOC hotu lian zawkte hnena thlen turin an ngen a; a ṭul a nih chuan carrying contractor truck bakah, truck motor dang pawh pawt mai turin an ngen bawk.

Ranjit Basumatary sawi danin, IOC Manager-in October 14, 2016 tlai khan order chhuah a, Mizorama gas agency-te chu Mualkhang leh Borkhola aṭangin truck intum chawpin gas an phur thei tih a hriattir a; carrying contractor kaltlang loa gas an phur dawn a nih chuan, tihfel ngaite pawh a hriattir nghal. Hei vang hian nimin thleng khan gas phur duh truck 87 an in report tawh a ni.

Carrying contractor-in gas a phurh ṭhat duh loh vanga action an lak dan zawhna chhangin, Mualkhang Bottling Plant Manager chuan, "NEISO-in action an la dawn niin an sawi a, kum dang atan an blacklist mai thei," a ti.

MNF MLA-te aiawha thu sawitu Lalruatkima chuan, Mualkhang Bottling Plant-ah gas a tam tih sawiin, harsatna ber chu truck tam tawk lo leh transporter-te'n an tih
ṭhat duh loh chu a nih thu a sawi a, "Gas harsatna chingfel turin sorkarin hmalakna awmze nei a la nei lo a, gas awm siin Mizo mipui kan ṭám a ni. Sorkarin min mutthlûksan hi ná kan ti a, mipuite harsatna hi min ngaihsak duh lo a ni," a ti a; IOC lamin bottling plant thar lian zawk siam an duh chungin sorkarin ram a hmuhsak thei loah sorkar a puh.

Lalruatkima chuan, sorkarin IOC-te a thawhpui ṭha tawk lo nia sawiin, "Mipui harsatna an sukiang thei lo hi sorkar zel tlakah kan ngai lo. Gas bûr tam tak a awm reng laia mipui hnen a thleng si lo hi sorkar mawh a ni," a ti a; gas tichingpentute lakah sorkarin tun thlengin action a la la lo niin a sawi bawk.

Gas hnianghnâra pe thei sorkar Mizoramin a mamawh tih sawiin, Lalruatkima chuan, "Sorkarin rang taka hma a lak loh chuan MNF-in hma kan la dawn a, kan hmalaknaah kan kal na deuh a nih pawhin, min hrethiam turin kan ngen a ni. Gas harsatna sorkar mawh a ni tih hre lo kan hrawn hi a vanduaithlak hle," a ti.