Sorkar hotute'n gas harsatna an sawiho

Food, Civil Supplies & Consumer Affairs (FCSCA) minister John Rotluangliana hoin a pisaah nimin khan sorkar hotute'n gas harsatna an sawiho.

Minister chuan, gas bûk tling leh khawih chingpen loh hnianghnâr taka Mizoram mipuiin an dawn theih nan sorkarin hma a la mek tih sawiin, dawhthei taka nghak hram hram turin mipui a ngen.

Meeting-ah hian, gas phurh chungchanga harsatna tawh a nih dan sawifiah a ni a; oil refinery leh Mizoram tana LPG bottling plant -Borkhola, Silchar leh Mualkhang aṭanga gas phur chhuak tur contractor-te chu Indian Oil Corporation (IOC) dan angin tender chhanga rawih an ni a, anmahni bàn leh rawih thuah Mizoram sorkar a inrawlh thei lo niin sorkar thuchhuah chuan a tarlang.

Sorkar thuchhuah tarlan danin, IOC dan angin, gas phurtute'n explosive licence an neih a ngai a, automatic braking system (ABS) leh tracking device an neih vek a ṭul a, mimal truck duh anga rawih ngawt theih a ni lo.

Carrying contractor-te'n tender an chhanna a hniam lutuk avangin a phurtu driver-te hlawh an pe tam thei lo a, Mizoram sorkar leh Central YMA hmalaknaa Mizoramah gas bûk nawn leh ṭhin a nih tak avangin driver-te an lungawi lo a ni.

Sorkarin hmalak dan tarlangin sorkar thuchhuah chuan, "IOC-ah thil awmzia zawhfiah niin, company official-te'n an enfiah mek a, Mizoram sorkar duh ang-in gas phurtute'n tihsual an nei a nih chuan a phû tâwka hremna pe tur leh a phurtu dang ruai tur te, Borkhola Bottling Plant aṭanga gas tam zawk Mizorama thawn turtein a thlen tawh. Petroleum & Natural Gas ministry-ah gas supply tam zawk hmuh theihna tur leh distributor leh company dangte Mizoramah luhtir turin ngenna thehluh a ni tawh," a ti.

Sorkar thuchhuah tarlan dan-in, FCSCA Minister-in October 10, 2016-ah Ministry of Petroleum & Natural Gas decretary Kapil Dev Tripathy a hmu a, October 13-ah gas harsatna thleng mek sukiang turin Ministry-ah lehkha a thawn bawk. Gas mamawh phuhru turin October 14-16 chhung khan gas bûr 18,000 phurh a ni.

Gas phurtu (transporter)-te chu an kîr leh lamah Mualkhang Bottling Plant-ah in report-in, chu'ng motor vêk hmang chuan Mizoram khaw hrang hrangah gas sem chhuah leh ṭhin a ni. In report loa tlân tlang an awm ṭhin
tih hriat a ni a, a danna turin hma an la mek. Meeting chuan, Mualkhangah Legal Metrology site office thar hawn ni se, an ti.

Supply Minister hian nimin tlai khan Mualkhang Gas Bottling Plant a tlawh nghal a ni.