Gas-a sorkar hmalakna kan duhkhawp lo - Lalduhoma

ZNP president Lalduhoma chuan, eirawngbawlna gas chungchanga tun thlenga sorkar hmalakna chu a lungawithlak loh an tih thu sawiin, "Gas chungchanga sorkar hmalakna kan duhkhawp lo," a ti.

Nimina ZNP office-a inkhawmah thu sawiin Lalduhoma chuan, “A bûr dik, bûk tling kum kha leh chen min pe duh lotute'n min tihtauh khum ngam a. A phurtu contractor-te hian Zoram mipui min hmusit em em a ni. Sorkar hian he harsatna hi eng ang chiahin nge a bawhzui a, eng chen nge harsatna hi a chinfel tawh?" a ti a; sorkar hmalakna hriattur mumal a awm lo nia sawiin, chak leh zuala hma la turin Mizoram sorkar a phût.

Gas tihchingpen ṭhin chu MNF sorkar lai aṭanga inṭan tawh nia sawiin, Duhoma chuan, “MNF sorkar lai khan kawtkaiah 'Gas induh em?’ tiin min zâwt ṭhin. Khang gas an zawrhte kha tihching-pen tawh hnu a ni a, gas tih-chingpen MNF sorkarin a ngaimawh loh vanga zawrh chhawn tam a ni,” a ti a; tun hnaia gas tih-chingpen titawp tura Central YMA hmalakna chu thláwp ṭheuh turin Mizoram mipui a sáwm.

ZNP President chuan, India rama working journalist upa bera puan, Lalbiakthanga Pachuau, Zoram Tlangau editor chu a lawmpui thu a sawi a; Kolasib-a chanchinbu Ramnuam editor K Lalthlamuana thih chung-changah, a chhungte a tawrhpui thu a sawi bawk.