Mizorama ICDS kalpui dan a ṭha - CM

Chief minister Lal Than-hawla chuan, Mizo-rama ICDS kalpui dan chu hmun dang aiin a ṭha zawk nia a hriat thu sawiin, "Nausen leh nau paite an ngaihven avangin infant mortality rate (IMR) pawh a tlakhniam phah a ni," a ti.

Nimin khan CM Lal Thanhawla hoin CMO conference hall-ah Integrated Child Development Services (ICSD) scheme hnuaia State Mission Steering Group (SMSG) an ṭhukhawm a; Social Welfare minister PC Lalthanliana leh parliamentary secretary K Lalrinthanga bakah, SMSG member-te an tel.

Lal Thanhawla chuan, Mizorama ICDS kalpui dan ṭha thawkhat mah se, duh tâwk mai loa India rama a tiṭha ber ni tura ṭan tlan a ngaih thu a sawi a ni.

Social Welfare minister PC Lalthan-liana pawhin, ICDS thuam chakna leh her remna ‘Posts sanctioned under strengthening and restructuring’ atan chak taka hma lak mek a nih thu a sawi a, "He mia a thawh khatna atan post thar 52 siamna chak taka kalpui mek a ni," a ti.

Meeting-ah hian, Mizorama ICDS dinhmun te, thawktute dinhmun te, post awm dan te, post siam belh tur te, district lamah inbun dan turtea ruahmannate Social Welfare director Vanlaldini leh deputy director Laldikkimi ten an sawifiah a; ICDS hnuaia thawk pension la fel lote chungchang leh anganwadi worker leh helper-te lawmman tihsan dan tur pawh an sawiho.

Sawrkar laipuiin nausen, nu naupai, nu nausen enkawl mek leh naupang kum ruk hnuai lamte enkawlna a ngai pawimawh a; chuta tan chuan ICDS kal-pui mek dan her remin, ICDS chu mis-sion mode-a kalpui turin 'Strengthen-ing & restructuring of ICDS' ti turin Inter Ministerial Group leh Planning Commission-te'n kum 2013 khan an rawt a ni.

Rawtna ang chuan state tinte chu ICDS kalpui turah hriattir niin, State Mission Steering Group pawh ruahmanna thar hnuaia din a ni a; SMSG-ah hian Chief Minister chu Chairman niin, SWD Secretary chu ICDS Mission Director atan dah a ni. Chief Secretary kaihhruaina hnuaiah ICDS atan State Empowered Committee din a ni bawk.

Strengthening & restructuring of ICDS atan tun hnaiah joint director pakhat leh district programme officer pali post hnawhkhah a ni a, a thawh khatna atan post 47 siam turin hmalak mek a ni. District-a Cell awmsa pahnih bakah, Cell pali din thar a ni dawn. A thawh hnihna leh a thawh thumnaah post 145 siam tum a ni bawk a; thawktu tur lak thar turte chu co-terminus tur a ni.

Kumin June thlaa Council of Ministers ṭhukhawm chuan mission mode-a ICDS kalpui a, a ruangám her rem leh thuam chak nan post 57 siam leh hnawhkhah rawtna an lo pawm tawh a ni.

ICDS hi Mizoramah kum 1978-1979 ah kalpui ṭan niin, ICDS block hmasa ber chu East Lungdar a ni a, tunah chuan RD Block zawng zawngah ICDS an awm tawh. Anganwadi centre 2,244 a awm mek a, chu'ngah chuan naupang kum 6 hnuai lam 80,081 leh nu naupai mek leh nau enkawl mek nu 20,477-te'n ICDS hnuaia hamṭhatna an dawng mek a ni.