Aizawl leh Lungleiah NLUP sem

Nimin khan minister Lal Thanzara'n Chanmari YMA Hall-ah Commerce and Industries department hnuaiah NLUP ṭanpuina a sem a; Lungleiah pawh Horticulture department hnuaiah NLUP ṭanpuina sem a ni bawk.

Chanmari YMA Hall-a NLUP sem hi Aizawl North-III leh Aizawl West-III biala mite tan niin, third phase second instalment hnuaiah a ni a, mi 359 hnenah sem a ni. Ṭanpuina hi petty trade-I, petty trade-IV, carpentry, tinsmithy, blacksmithy, special micro enterprise, steel fabrication, hmunphiah siam, chow siam thlangtute pek a ni.

NLUP semtu Lal Thanzara chuan, NLUP vangin Mizoram mipuite ei leh barah an intodelh phah nia sawiin, "Rethei fál bik awm loa hlim tlang taka kan khawsakho theihna tur kawng sial hi a tum ber a ni," a ti a; September 30, 2016 thlengin Mizorama chhungkaw 1,32,071 hnenah NLUP pek a nioh tawh thu a sawi. NLUP sem hnuah tlang ram lo neih pawh 29.75%-in a tlahniam tawh niin a sawi bawk.

Lungleiah chuan Horticulture department-in an office-ah NLUP third phase leh fourth phase second instalment an sem a; Lunglei circle hnuai-a serthlum, lakhuih-thei, thingpui leh kuhva thlangtute hnenah sem a ni. Serthlum thlangtute hnenah Rs. 4,500
ṭheuh, lakhuihthei thlangtute hnenah Rs. 6,000
ṭheuh, thingpui thlangtute hnenah Rs. 2,000
ṭheuh leh kuhva thlangtute hnenah Rs. 7,000
ṭheuh pek a ni.