EFCI Kohhran pawisa chàwitir an ni Inkhawm vanga sum cháwitute an inchhîr lo

Sakawrdaia Evangelical Free Church of India (EFCI) Kohhran chu Krismas ní khan biak-inah an inkhawm a, hei vang hian Sakawrdai police-te chuan Rs. 5,000 an chawitir. Mizorama kohhran zingah Covid-19 léng kaihhnawiha sum inchawitirna hmasa ber nia hriat a ni.

Sakawrdai EFCI Kohhran hruaitute chuan Kristiante hunpui bera inkhawm ngei ṭha an tih vanga inkhawm an nih thu leh an inchhîr loh thu an sawi.

EFCI Kohhran hruaitute chuan Vanglaini palai zawhna chhángin, Krismas chu mihringte chhandamtu Isua Krista pian ni a ni a, hlú an tih êm avang te, Mizo Kristiante'n hunpui an ngaih pawimawh ber a nih avangin inkhawm an buatsaih tih an sawi a, "Kum khata vawi khat thleng a ni a, kan nghahfâk a ni si a, inkhawm kan rawt a, kohhran dang tih dan pawh kan en lo," an ti.

Kohhran hruaitute sawi danin, an kohhranah member 200 chuang an awm a; Krismas nía inkhawm chu chawhma dar 10-ah an ṭan a, biak-inah an khat a ni. Mask an vuah hlawm a, hla sak an tum lo. Mahse, an kohhrana mi pitar kum 105 vel miin hla a thlang a, sa hrâm tura a ngen avangin a hla thlan chu an sa a, an thâwm a ṭha ta deuh a; chu chu pawisa an chàwi chhan ber niin an hria a ni.

An inkhawm avang chuan Sakawrdai SDPO leh OC hoin police-te biak-in lamah an kal tih sawiin Kohhran hruaitute chuan, "Rs. 5,000 cháwi turin min ti a, sorkar dan ang loin kan inkhawm miau a. Police hotute chuan, 'Report kan dawng sia, in chàwi a ngai a ni,' an rawn ti a, kan cháwi ta a ni," an ti.

Krismas inkhawmah chuan thawhlawm an thawh khawm tih sawiin hruaitute chuan, "Khami tûk kha kan kohhran chanchina thawhlawm a tam ber ṭum a ni. Rs. 4,646 kan thawh a, pawisa fai ni loa thawhte suma chantir chuan cheng 5,000-6,000 inkar a ni ang. Kan Pathian hi intum chawp Pathian a ni tih a lang chiangin kan hria," an ti a; an boruak hriaa hmun dang dang aṭanga pawisa thawh mi eng emaw zat an awm thu leh, an chàwi zat aia tam an dawn thu an sawi.

Kohhran hruaitute chuan, sorkar mitah chuan an tihsual a awm ngei ang tih an sawi a, "Sorkar tih loh záwng kan lo ti a, sorkar hi kan ngainêp ni hauh loin, kan inchhîr lo khawp mai a. Kristian kan nih angin Krismas hi kan ngaihlu êm a, kan inkhawm tawp mai a ni ber," an ti.