COVID-19: Mizoram dinhmun Hripui vei mi 4 hmuh belh a ni
December 26, Inrinni khan Mizoramah Covid-19 vei mi pali hmuh chhuah a ni a, an zinga a tam zawk, mi pathum chu Mizoram chhunga kái chhâwng an ni. Nimin khan hripui laka fihlim tawh mi pathum chhuahtir an ni thung.
Covid-19 vei hmuh chhuah tharte chu mipa leh hmeichhia pahnih ve ve an ni a; TrueNAT-PCR hmanga district pasariha sample 110 endik aṭanga hmuh mi pakhat leh Rapid Antigen Test (RAT) hmanga district pariata sample 265 endik aṭanga hmuh mi pathum an ni. ZMC laboratory-ah erawh chuan swab sample endik a ni lo.
Sorkar thuchhuah tarlan danin, RAT hmanga Covid-19 positive hmuh chhuahte chu tualchhunga hri kai vek an ni a, natna (Covid-19 symptom) lang chhuak pakhat a awm. An zinga pakhat chu a kàina hriat a ni lo. TrueNAT-PCR hmanga hmuh chhuah mi pakhat chu state pawn aṭanga tun hnaia rawn lut a ni thung.
Nimin khan Covid-19 laka fihlîm tawh mi pathum chu enkawlna hmun aṭangin chhuahtir an ni a; an vaiin Lawngtlai CCC-a awmte an ni.
Mizorama Covid-19 vei mi 4,182 hmuh chhuah tawhte chu mipa 3,075 leh hmeichhia 1,107 an ni a; nimin tlai dar 5 thleng khan damin mi 4,049 (96.82%) chhuahtir an ni tawh a, mi pariat (0.19%) thi tawhin, enkawl mek mi 125 (2.99%) an awm.
December 26 thleng khan Mizoramah swab sample 1,76,131 endik tawh niin, chu'ng aṭanga Covid-19 positive hmuh chhuah tawh 4,182 chu 2.40% a ni.
SRH leh CCC hrang hranga hripui vanga enkawl mek mi 128 zinga mi 113 (88.71%) chu civil mi an ni a; BSF sipai pakua, Assam Rifles sipai pakhat leh CRPF mi panga enkawl mek an ni bawk.
Mizorama Covid-19 positive hmuh chhuah tawh mi 4,182 zinga mi 1,983 chu Mizoram chhunga kái an ni a, mi 2,199 chu state páwn aṭanga rawn lût an ni.
RAT hmanga hmuh:
Hunthar Veng - 1: Hmeichhia kum 58, symptom a neih vanga endik, hri a kàina hriat loh.
Mampui - 2: Mipa kum 60 leh hmeichhia kum 47. Tualchhunga kái, symptom nei lo ve ve.
TrueNAT-PCR-a hmuh:
BSF - 1: Mipa kum 30, 199 Bn BSF mi leh sa, Bihar aṭanga rawn lut, anmahni hmuna khung hran lai, symptom nei lo.