Ruihhlo laka fihlim theih dan tur zirho

Federation of Indian NGOs for Drug Abuse Federation (FINGODAP) Mizoram Chapter chuan, nimin khan Chanmari YMA Hall-ah ruihhlo laka ṭhalaite leh zirlaite an fihlim dan tur zirhona, Drug Abuse Prevention Awareness an buatsaih a; chief minister Lal Thanhawla
leh Social Welfare minister PC Lalthanliana ten an hmanpui.

Chief Minister chuan, sorkar leh tlawmngai pawlte'n kawng hrang hrangin ruihhlo do mah se, ṭhalaite'n a dona rilru an neih loh chuan a rêm lo ang tih a hlauhthawn thu a sawi a, "Sorkar, tlawm-ngai pawl leh kohhrante'n theihtawp chhuaha hma an lak mek lai hian, ṭhalai leh zirlaite'n ngaihtuahna fing leh fím hmanga an páwn lam leh chhung lam nun an fimkhurpui hle a ngai a ni," a ti.

Lal Thanhawla chuan, "Ruihhlo laka fihlim-na ṭha ber leh tlo ber chu inhnamhnawih loh hi a ni. Ruihhlo chìn hi thil hotêa lang, zûk leh hmuam leh vaihlo
aṭangtein a inṭan a, heng lakah hian kan fihlim a pawimawh," a ti a; ṭha-laite'n ruihhlo an ngaihtuah loh nan leh kawng dik lo an zawh loh nan sorkarin theihtawp a chhuah a, infiamna, zirna leh skill development lamah ṭhalaite tan nasa taka hmalak a nih thu a sawi.

Social Welfare minister PC Lalthanliana chuan, ruihhlo chu sorkar angin emaw, pawl angin emaw do hneh mai chi a ni lo tih sawiin, "Mimal tin hi ruih-hlo donaa kan ṭan tlan a pawimawh. Ruihhlo lakah vawiin hian kan fihlim a ni thei a, mahse, kan kawngka bulah a awm reng a ni tih i theihnghilh lo ang ," a ti a; zirlaite chu tih chhin châkna rilru nei lo tur leh an nunah ruihhlo leh thil ṭha lo seng lut lo turin a fuih.

PC Lalthanliana chuan, Mizoram sorkarin ruihhlo dona kawng-ah dan thar, 'Mizoram Drug Demand Policy 2016' leh 'Mizo-ram Drug (Controlled Substance) Bill 2016' te a duang a, Cabinet-in a pawmpui tawh thu leh Assembly session hmasa berah put luh a nih tur thu a sawi bawk.

Drug Abuse Prevention Aware-ness hi FINGODAP Mizo-ram Chapter president N Samuela’n a kaihruai a; psychiatrist Dr C Lalhrekima’n ruihhlo
ṭhat lohzia leh inven dante a sawi.