Gas harsatnaah sorkarin mawh a la ngam - Congress party

Congress party chuan thuchhuah siam-in, tunlaia eirawngbawlna gas harsatna thleng mekah sorkarin mawh a la ngam a, nasa takin hma a la ngam niin an tarlang.

MPCC thuchhuah chuan, gas harsatna sutkian a nih theih nan gas distributor-te'n a rate ngaia phurh ve an inhuam angin Indian Oil Corporation (IOC)-ah Supply minister John Rotluangliana'n a thlen tawh niin an sawi a, "IOC pawhin a ngenna pawmin, distributor-te phurh phalna a pe tawh," an ti a; mahse, gas chu puak thei leh kâng thei a nih avangin distributor-te'n duh anga tam gas phurtu tur lirthei an nei hrih lo niin an sawi.

Mizoram páwn aṭanga Mualkhanga gas bûr dah ṭhinte chu Mualkhangah tâwp mai loa Mualkhang aṭanga sem darh nghal tura tih an ni tih sawiin, MPCC chuan, "Thupek awih loa let lehte pawh October 17, 2016 zan khan Kawnpui police-in truck pakua an lo man a, gas phur tura lettir leh vek an ni," an ti.

Congress party tarlan danin, Mizoram sorkarin a nawr angin IOC-in carrying-contractor hnenah show cause notice a pe tawh a, IOC-in hma an lak avangin harsatna thlen hlim aiin tunah chuan gas phurtu truck an tam tawh zawk.

October 14-16 chhungin gas bûr 18,000 a lo thleng tawh a, bullet truck pasarih a thleng bawk. Mipuite'n gas an harsat vanga buaina nasa zawk a chhuah ai chuan sorkarin dân pêl si loin gas bûrte'n mipui choka a thlen ngei theih nana hmalak an hreh dawn lo tih an sawi.

MPCC chuan, sorkarin mipui harsatna tawh hre rengin theihtawp a chhuah a, FCSCA minister John Rotluang-liana pawh nimin khan Mualkhang Gas Bottling Plant-ah a kal niin an sawi a, "Kan harsatna tawhte hi nakin atana kan nihlawh zawkna tur a nih avangin dawhthei taka mipuite'n lo nghak turin kan chah a ni," an ti.